വിജയ് ഹസാരെ ട്രോഫി ക്രിക്കറ്റ് മത്സരത്തിൽ സെമി കാണാതെ കേരളം പുറത്തായി. ക്വാർട്ടർ ഫൈനലിൽ രാജസ്ഥാനെതിരെ നാണംകെട്ട തോൽവി ഏറ്റുവാങ്ങിയായിരുന്നു പുറത്തായത്. സഞ്ജുവില്ലാതെ ഇറങ്ങിയ കേരള ടീമിനെ രാജസ്ഥാൻ 200 റൺസിനാണ് തകർത്തത്. ആദ്യം ബാറ്റ് ചെയ്ത രാജസ്ഥാൻ 268 റൺസ് വിജയലക്ഷ്യം ഉയർത്തി. ഇത് പിന്തുടർന്ന കേരളത്തിന് 67 റൺസെടുക്കാനെ സാധിച്ചുള്ളൂ.
കേരള ടീമിന്റെ ക്യാപ്റ്റൻ ആയ സഞ്ജു സാംസണിന്ദക്ഷിണാഫ്രിക്കൻ പര്യടനത്തിന് വേണ്ടിയുള്ള വിളി ലഭിച്ചതായിരുന്നു ടീമിനെ തളർത്തിയത്. ടോസ് നഷ്ടമായി ആദ്യം ബാറ്റ് ചെയ്ത രാജസ്ഥാന് വേണ്ടി മഹിപാൽ ലോംറോർ സെഞ്ച്വറി നേടി. താരം 114 പന്തിൽ 122 റൺസുമായി പുറത്താകാതെ നിന്നത് ടീമിന് തുണയായി. 66 റൺസെടുത്ത വിക്കറ്റ് കീപ്പർ ബാറ്റ്സ്മാൻ കുനാൽ സിംഗ് റാത്തോഡ് മികച്ച പിന്തുണ നൽകി രാജസ്ഥാന്റെ വിജയത്തിന് മാറ്റ് കൂട്ടി. കേരളത്തിനായി അഖിൻ സത്താർ മൂന്നും ബേസിൽ തമ്പി രണ്ടും വിക്കറ്റുകൾ വീഴ്ത്തി.
മറുപടി ബാറ്റിംഗിൽ കേരള നിരയിൽ രണ്ട് പേർ മാത്രമേ രണ്ടക്കം കടക്കാൻ കഴിഞ്ഞുള്ളു. 39 പന്തിൽ 28 റൺസെടുത്ത സച്ചിൻ ബേബിയാണ് കേരള ടീമിന്റെ ടോപ് സ്കോറർ. രോഹൻ കുന്നുമ്മൽ 11 റൺസെടുത്ത്‌ ടീമിനെ പിന്തുണച്ചു. രാജസ്ഥാന്റെ അനികേത് ചൗധരിയുടെയും അറഫാത്ത് ഖാന്‍റെയും ബൗളിങ്ങാണ് കേരളത്തെ തരിപ്പണമാക്കിയത്. അനികേത് നാലും ഖാൻ മൂന്നും വിക്കറ്റുകൾ സ്വന്തമാക്കി.
