വ്യത്യസ്തമായ കഥകൾകൊണ്ടും അവതരണം കൊണ്ടും അഭിനയം കൊണ്ടും മികച്ചു നിൽക്കുന്നതാണ് മലയാളം സിനിമ. അടുത്തിടെ പുറത്തിറങ്ങിയ മമ്മൂട്ടി ചിത്രങ്ങളായ ഭ്രമയുഗത്തെയും കാതലിനെയും മോഹൻലാൽ ചിത്രമായ മലൈക്കോട്ടയ് വാലിബനെയും മലയാള സിനിമയെ ലോക സിനിമയുടെ നെറുകയിൽ എത്തിച്ച ടോവിനോയുടെ മിന്നൽ മുരളിയും 2018ഉം എല്ലാം ബോളിവുഡിലും മികച്ച അഭിപ്രായങ്ങളും അഭിനന്ദനങ്ങളും നേടിയിരുന്നു. ഇന്ത്യൻ സിനിമയും കടന്ന് ലോക സിനിമയിൽ വരെ ചർച്ചചെയ്യപ്പെട്ട മലയാള സിനിമയെ പ്രശംസിച്ചുകൊണ്ട് രംഗത്ത് വന്നിരിക്കുകയാണ് മലയാളിയും ബോളിവുഡ് താരവുമായ വിദ്യ ബാലൻ.
രസകരമായ ഒരു റീലാണ് നടി പങ്കുവച്ചിരിക്കുന്നത്. 1991-ൽ പുറത്തിറങ്ങിയ ‘മൂക്കില്ലാരാജ്യത്ത്’ എന്ന ചിത്രത്തിലെ ഒരു കോമഡി രംഗമാണ് വിദ്യ റീലിൽ അനുകരിച്ചിരിക്കുന്നത്. ലവ് മലയാളം സിനിമ എന്ന ഹാഷ്ടാഗോടെ ഇൻസ്റ്റഗ്രാമിൽ പോസ്റ്റ് ചെയ്ത റീലിന് നിരവധി പേർ കയ്യടികളും കമന്റുകളുമായി എത്തുന്നുമുണ്ട്. രണ്ടാഴ്ചയായി മലയാള സിനിമകൾ ഭ്രാന്തമായി കാണുന്നു എന്നും വിദ്യ വീഡിയോയ്ക്കൊപ്പം കുറിച്ചു. മലയാളി പ്രേക്ഷകർ ഇരു കയ്യും നീട്ടി സ്വീകരിച്ചിരിക്കുകയാണ് വിദ്യയുടെ ഈ വീഡിയോ.
