‘വർഷങ്ങൾക്ക് ശേഷ’ത്തിൽ ആടിയും പാടിയും പ്രണവ് മോഹൻലാൽ. ചിത്രത്തിലെ ആദ്യഗാനം റിലീസ് ചെയ്തു. ‘മധു പകരൂ’ എന്ന് തുടങ്ങുന്ന ഗാനത്തിന് സംഗീതം നൽകിയിരിക്കുന്നത് അമൃത് രാംനാഥ് ആണ്. കർണാടിക് സംഗീതജ്ഞയായ ബോംബെ ജയശ്രീയുടെ മകൻ ആണ് അമൃത്. ഗാനം ആലപിച്ചിരിക്കുന്നത് വിനീത് ശ്രീനിവാസൻ ആണ്.
റിലീസ് ചെയ്ത് മണിക്കൂറുകൾക്ക് ഉള്ളിൽ തന്നെ ഗാനം ആരാധർ ഏറ്റെടുത്തു കഴിഞ്ഞു. നിലവിൽ യുട്യൂബ് ട്രെന്റിങ്ങിൽ നാലാം സ്ഥാനത്താണ് പാട്ടുള്ളത്. മാത്രമല്ല, ഗാനത്തിലെ പ്രണവ് മോഹൻലാലിനെ കണ്ട് ഇത് വിന്റേജ് ലാലേട്ടൻ തന്നെ എന്നാണ് ആരാധകർ ഒന്നടങ്കം പറയുന്നത്. മോഹൻലാലിന്റെ ചില മാനറിസങ്ങളും പ്രണവിൽ കാണാൻ കഴിയുന്നുണ്ടെന്നും ആരാധകർ പറയുന്നു.
ഹൃദയം എന്ന സൂപ്പർ ഹിറ്റ് ചിത്രത്തിന് ശേഷം അതേ ടീം തന്നെ വീണ്ടും ഒന്നിക്കുന്ന ചിത്രം കൂടിയാണ് ‘വർഷങ്ങൾക്കു ശേഷം’. പ്രണവിനൊപ്പം കല്യാണി പ്രിയദർശൻ, ധ്യാൻ ശ്രീനിവാസൻ, ബേസിൽ ജോസഫ്, അജു വർഗീസ്, കല്യാണി പ്രിയദർശൻ, നീരജ് മാധവ്, നിത പിള്ള, അർജുൻ ലാൽ, നിഖിൽ നായർ, നിവിൻ പോളി, ഷാൻ റഹ്മാൻ തുടങ്ങി വൻ താരനിര തന്നെ ചിത്രത്തിൽ അണിനിരക്കുന്നുണ്ട്. വിനീത് ശ്രീനിവാസനും ചിത്രത്തില്‍ ഒരു കഥാപാത്രമായി എത്തും. മേരിലാന്റ് സിനിമാസിന്റെ ബാനറില്‍ വൈശാഖ് സുബ്രഹ്മണ്യം ആണ് ചിത്രത്തിന്‍റെ നിര്‍മാണം. ചിത്രം വിഷു റിലീസ് ആയി പ്രേക്ഷകർക്ക് മുന്നിലെത്തും.
