മലയാളികൾക്കൊരു സന്തോഷ വാർത്ത!കേരളത്തിന് അഭിമാനമായി ‘വടക്കൻ’. സജീദ് എ. സംവിധാനം ചെയ്ത് കിഷോറും ശ്രുതി മേനോനും പ്രധാന വേഷങ്ങളിലെത്തുന്ന ‘വടക്കൻ’ എന്ന ചിത്രം കാൻ ചലച്ചിത്രമേളയുടെ മാർഷെ ദു ഫിലിമിൻ്റെ ഫാൻസ്റ്റിക് പവലിയനിൽ പ്രദർശിപ്പിക്കുന്ന ഏഴു ചിത്രങ്ങളിൽ ഒന്നായി തിരഞ്ഞെടുക്കപ്പെട്ടിരിക്കുന്നു. കീക്കോ നകഹര, റസൂൽ പൂക്കുട്ടി, ബിജിബാൽ, ഉണ്ണി ആർ. എന്നിവർ അണിയറയിൽ ഒരുക്കുന്ന ‘വടക്കൻ’ ഈ വിഭാഗത്തിൽ ഇടംനേടുന്ന ഏക മലയാളചിത്രമെന്ന നേട്ടം കൂടി സ്വന്തമാക്കിയിരിക്കുകയാണ്.
ഫിലിം മാർക്കറ്റുകളിൽ പ്രധാനമായ കാനിന്‍റെ മാർഷെ ദു ഫിലിമിൽ ചിത്രം പ്രദർശിപ്പിക്കുന്ന നിരവധി വൈവിധ്യമാർന്ന ചിത്രങ്ങൾക്കൊപ്പമാണ് ‘വടക്കനും ഇടം പിടിച്ചിരിക്കുന്നത് എന്നതിൽ ഓരോ മലയാളികൾക്കും അഭിമാനിക്കാം. മലയാള സിനിമയുടെ വൈവിധ്യതയും കേരളത്തിൻ്റെ സംസ്കാരവും നിഗൂഡത നിറഞ്ഞ പശ്ചാത്തലത്തിൽ ഇത്തരമൊരു കഥയിലൂടെ അവതരിപ്പിക്കുമ്പോൾ പ്രേക്ഷകരിൽ അത് ഏറെ പ്രതീക്ഷ സൃഷ്ടിക്കുന്നുണ്ട് എന്ന് മേളയുടെ സംഘാടകർ തന്നെ അഭിപ്രായപ്പെട്ടു.
ഓഫ്‌ബീറ്റ് മീഡിയ ഗ്രൂപ്പിന്‍റെ സഹസ്ഥാപനമായ ഓഫ്‌ബീറ്റ് സ്റ്റുഡിയോയുടെ ബാനറിലാണ് ‘വടക്കൻ’ നിർമ്മിച്ചിരിക്കുന്നത്. പുരാതന വടക്കേ മലബാറിലെ നാടോടിക്കഥകളുടെ കഥാതന്തുവിൽ ഒരുങ്ങുന്ന ഒരു സൂപ്പർനാച്ചുറൽ ത്രില്ലറാണ് ചിത്രം. ലോകോത്തര അഭിനേതാക്കളെയും അണിയറ പ്രവർത്തകരെയും ഒന്നിപ്പിച്ചുകൊണ്ട് രാജ്യാന്തര, ഹൈപ്പർലോക്കൽ ആഖ്യാനങ്ങളെ ഒരു കുടക്കീഴിൽ കൊണ്ട് വന്ന് ഇന്ത്യൻ സിനിമയെ പുനർനിർവചിക്കുക എന്നതാണ് ‘വടക്കനി’ലൂടെ ഞങ്ങൾ ലക്ഷ്യമിടുന്നത്- ഓഫ്‌ബീറ്റ് മീഡിയ ഗ്രൂപ്പ് സ്ഥാപകനും ചിത്രത്തിന്‍റെ നിർമ്മാതാവുമായ ജയ്ദീപ് സിംഗ് അഭിമാനത്തോടെ പറഞ്ഞു.
കാനിലെ ഈ പ്രദർശനം ഞങ്ങൾക്ക് അഭിമാനകരമായ നേട്ടമാണ് സമ്മാനിച്ചത്. സൂപ്പർനാച്ചുറൽ ത്രില്ലറായ ‘വടക്കൻ’ ഒരു അഭിമാന പ്രൊജക്ടാണ്. ലോകമെമ്പാടും പ്രേക്ഷക ശ്രദ്ധനേടാൻ ഏറെ സാധ്യതയുള്ള കേരളത്തിൻ്റെ സാംസ്കാരിക പൈതൃകമാണ്ചിത്രം മുന്നോട്ടുവെയ്ക്കുന്നത് എന്നും അദ്ദേഹം കൂട്ടിച്ചേർത്തു. മലയാളം കൂടാതെ തമിഴ്, കന്നഡ , തെലുങ്ക് ഭാഷകളിലേക്കും ചിത്രം മൊഴിമാറ്റി റിലീസ് ചെയ്യാനുള്ള പദ്ധതികൾ നിലവിലുണ്ട്. കാനിൽ തിളങ്ങാൻ കാത്തിരിക്കുകയാണ് വടക്കൻ, ഒപ്പം ഓരോ മലയാളികളും.
