മലയാളത്തിൽ ഏറെ ജനശ്രദ്ധ നേടിയ ‘ദി ഗ്രേറ്റ് ഇന്ത്യൻ കിച്ചണ്‍’ എന്ന ചിത്രം ഇനി ഹിന്ദിയിലേയ്ക്കും. ‘മിസിസ്’ എന്ന് പേരിട്ടിരിക്കുന്ന ചിത്രത്തിന്റെ ഹിന്ദി റീമേക്ക് ടീസർ റിലീസ് ചെയ്തിരിക്കുകയാണ് അണിയറപ്രവർത്തകർ. നിമിഷ സജയൻ അവതരിപ്പിച്ച നായികാ കഥാപാത്രമായി ചിത്രത്തിൽ സന്യ മൽഹോത്രയാണ് എത്തുന്നത്.
ആരതി കാദവ് ആണ് മിസിസ് എന്ന ചിത്രം സംവിധാനം ചെയ്യുന്നത്. ഹർമൻ ബവേജയാണ് നിർമ്മാണം. സുരാജ് വെഞ്ഞാറമൂട് ചെയ്ത നായക വേഷം നിഷാന്ത് ദഹിയയാണ് അവതരിപ്പിക്കുന്നത്. കൻവൽ ജിത് സിങ് ആണ് മറ്റൊരു പ്രധാന കഥാപാത്രമായെത്തുന്നത്.
ദി ഗ്രേറ്റ് ഇന്ത്യൻ കിച്ചൺ എന്ന ചിത്രം ഇതിനോടകം തമിഴിലും റീമേക്ക് ചെയ്തിരുന്നു. ഐശ്വര്യ രാജേഷും രാഹുൽ രവീന്ദ്രനുമാണ് പ്രധാന കഥാപാത്രങ്ങളെ അവതരിപ്പിച്ചത്. വിവാഹശേഷമുള്ള ഇന്ത്യയിലെ ഒരുകൂട്ടം സ്ത്രീകളുടെ ജീവിതം തുറന്നുകാട്ടുന്ന ചിത്രം ഇരുഭാഷകളിലും മികച്ച വിജയമായിരുന്നു.
