സൂര്യ നായകനായെത്തുന്ന ബ്രഹ്മാണ്ഡ ചിത്രം ‘കങ്കുവ’യുടെ സെക്കന്റ് ലുക്ക് പോസ്റ്റർ പുറത്ത്‌ വിട്ടു. തെന്നിന്ത്യൻ സിനിമാ പ്രേമികൾ ആകാംക്ഷയോടെ കാത്തിരിക്കുന്ന ‘കങ്കുവാ’ സൂര്യയുടെ കരിയറിലെ തന്നെ ഏറ്റവും കൂടുതൽ മുടക്കുമുതലുള്ള ചിത്രമാണ്. ശിവ സംവിധാനം ചെയ്യുന്ന ‘കങ്കുവ’ പീരിയോഡിക് ത്രീഡി ചിത്രമായാണ് തിയ്യറ്ററുകളിൽ എത്തുക.
ആരാധകരെ ത്രസിപ്പിക്കുന്ന ലുക്കിലാണ് പുത്തൻ പോസ്റ്ററിൽ സൂര്യ എത്തിയിരിക്കുന്നത്. ചുരുങ്ങിയ സമയം കൊണ്ട് പോസ്റ്റർ വെെറലായിരിക്കുകയാണ്. ചിത്രത്തിന്റെ ഷൂട്ടിങ് പൂർത്തിയായെന്ന് സൂര്യ നേരത്തെ അറിയിച്ചിരുന്നു.1000 വർഷങ്ങൾക്ക് മുമ്പുള്ള കാലഘട്ടത്തിലൂടെ സഞ്ചരിക്കുന്ന ‘കങ്കുവ’യിൽ ഒരു യോദ്ധാവായാണ് താരം എത്തുന്നത്. സ്റ്റുഡിയോ ഗ്രീനും UV ക്രിയേഷൻസും ചേർന്ന് നിർമ്മിക്കുന്ന ‘കങ്കുവ’യുടെ ബഡ്ജറ്റ് 350 കോടി രൂപയാണ്.
38 ഭാഷകളിലായി റിലീസ് ചെയ്യുന്ന ചിത്രത്തിൽ ബോളിവുഡ് താരം ദിഷ പഠാണിയാണ് നായികയായെത്തുന്നത്. ബോബി ഡിയോളാണ് ചിത്രത്തിലെ വില്ലൻ. സൂര്യയുടെ ഇതുവരെ കാണാത്ത വേഷപ്പകർച്ചയാണ് ചിത്രത്തിൽ കാണാൻ കഴിയുക. വിവേകയും മദൻ കർക്കിയും ചേർന്നാണ് ചിത്രത്തിലെ ഗാനരചന. സുപ്രീം സുന്ദറാണ് സംഘട്ടന സംവിധാനം നിർവഹിക്കുന്നത്. യു.വി. ക്രിയേഷൻസിന്റെ ബാനറിൽ വംശി പ്രമോദും സ്റ്റുഡിയോ ഗ്രീനിന്റെ ബാനറിൽ കെ.ഇ. ജ്ഞാനവേൽ രാജയും ചേർന്നാണ് ചിത്രം നിർമ്മിക്കുന്നത്.
