ഐപിഎല്‍ ചരിത്രത്തിലെ മൂന്നാം കിരീടം സ്വന്തമാക്കിയതിന്റെ ആവേശത്തിലാണ് കൊല്‍ക്കത്ത നൈറ്റ് റൈഡേഴ്‌സ്. താരങ്ങൾക്കൊപ്പം ടീം ഉടമ ഷാറൂഖ് ഖാനും അതീവ സന്തോഷത്തിലാണ്. കുടുംബത്തോടൊപ്പം ഫൈനൽ കാണാനെത്തിയ കിങ് ഖാൻ തന്റെ ടീം വിജയിച്ചതോടെ താരങ്ങളെ കെട്ടിപ്പിടിച്ചും എടുത്തുയർത്തിയുമാണ് സന്തോഷം പ്രകടിപ്പിച്ചത്.
ഐപിഎല്ലിന്റെ തുടക്കം മുതൽ തന്റെ ടീമംഗങ്ങൾക്ക് ആത്മവിശ്വാസം പകരാൻ കയ്യടിച്ചും ആർപ്പുവിളിച്ചും ഗ്യാലറിയിലെ നിറസാന്നിധ്യമായിരുന്നു കിങ് ഖാൻ. കൊൽക്കത്ത ഫൈനലിൽ സീറ്റുറപ്പിച്ചതോടെ വിജയം ഉറച്ചതിന്റെ പ്രതീതിയിലായിരുന്നു ഷാറൂഖ്. ഒടുവിൽ അവസാന പോരാട്ടത്തിൽ ഹൈദരാബാദിനെ കൊൽക്കത്ത നിസാരമായി തോൽപ്പിച്ചപ്പോൾ ഗ്യാലറിയിലിരുന്ന് കുടുംബത്തോടൊപ്പം മതിമറന്ന് സന്തോഷിക്കുകയായിരുന്നു താരം. പിന്നാലെ ഗ്രൗണ്ടിലിറങ്ങിയ ഷാറൂഖ് താരങ്ങളെ അഭിനന്ദിക്കുകയും ചെയ്തു.
കെകെആറിന്റെ വിജയത്തിൽ ആഹ്ലാദിക്കുന്ന ഷാറൂഖ് ഖാന്റെയും വീഡിയോയും ചിത്രങ്ങളും ഇതിനോടകം സാമൂഹ്യമാധ്യമങ്ങളിൽ വൈറലാകുകയും ചെയ്തു. അതേസമയം, സൺറൈസേഴ്‌സ് ഹൈദരാബാദിന്റെ പതനത്തിൽ വിങ്ങിപ്പൊട്ടുകയായിരുന്നു ടീമിൻ്റെ ഉടമ കാവ്യ മാരാർ. കൊൽക്കത്ത വിജയകിരീടം ചൂടിയതോടെ കാവ്യ കണ്ണീരോടെ ഗാലറിയിൽ നിന്നും മടങ്ങി.
