ഏഴ് വർഷത്തെ ഇടവേളയ്ക്ക് ശേഷം ഏകദിന ക്രിക്കറ്റ് ലോകകപ്പിനായി ഇന്ത്യയിലെത്തി പാക്കിസ്ഥാൻ ടീം. പാക് താരങ്ങൾക്കുള്ള വിസ ഇന്ത്യ അനുവദിക്കാൻ വൈകിയതിനാൽ ഇന്നാണ് താരങ്ങൾ ഹൈദരാബാദിൽ വിമാനമിറങ്ങിയത്. ഇന്ത്യയിലേയ്ക്ക് പുറപ്പെടേണ്ടതിന്റെ 11 മണിക്കൂർ മുമ്പ് മാത്രമാണ് ഇന്ത്യ പാക് താരങ്ങൾക്ക് വിസ അനുവദിച്ചത്. മറ്റ്പല രാജ്യങ്ങളിൽ നിന്നുമുള്ള കളിക്കാർ ഇതിനോടകം ഇന്ത്യയിലെത്തിക്കഴിഞ്ഞു. 2016 ട്വന്റി20 ലോകകപ്പിനായാണ് പാക്കിസ്ഥാൻ ടീം അവസാനമായി ഇന്ത്യയിൽ എത്തിയത്.
നാളെ ന്യൂസീലൻഡിനെതിരെ ഹൈദരാബാദിലാണ് പാക്കിസ്ഥാന്റെ ആദ്യ സന്നാഹമത്സരം നടക്കുക. സുരക്ഷാ കാരണങ്ങളാൽ അടച്ചിട്ട സ്റ്റേഡിയത്തിലാണ് മത്സരം നടത്തുക. ഒക്ടോബർ 3-ന് ഓസ്ട്രേലിയയ്ക്കെതിരായ സന്നാഹ മത്സരവും ഹൈദരാബാദിൽ തന്നെ നടക്കും. ഒക്ടോബർ 14-ന് അഹമ്മദാബാദിലാണ് ലോകകപ്പിലെ ആവേശോജ്ജ്വലമായ ഇന്ത്യ-പാക്കിസ്ഥാൻ പോരാട്ടം.
