മമ്മൂട്ടിയും ജ്യോതികയും പ്രധാന വേഷങ്ങളിലെത്തിയ ‘കാതൽ ദ് കോർ’ സിനിമയെ പ്രശംസിച്ച് നടി സമാന്ത റൂത്ത് പ്രഭു. ഈ വർഷത്തെ ഏറ്റവും മികച്ച സിനിമയാണ് കാതലെന്നാണ് ചിത്രത്തേക്കുറിച്ച് നടി പറഞ്ഞത്. ‘ഈ വർഷത്തെ ഏറ്റവും മികച്ച സിനിമ.. മമ്മൂട്ടി സർ നിങ്ങളെന്റെ ഹീറോയാണ്, ഈ പ്രകടനത്തിൽ നിന്നും പുറത്തുകടക്കാൻ കുറച്ച് കാലം വേണ്ടിവരും. ജ്യോതികയോട് സ്നേഹം മാത്രം. ജിയോ ബേബി ഇതിഹാസതുല്യം‘ എന്നാണ് സമാന്ത സാമൂഹ്യമാധ്യമത്തിൽ കുറിച്ചത്.
ജിയോ ബേബി സംവിധാനം ചെയ്ത കാതൽ നവംബർ 23-നാണ് തിയേറ്ററിൽ റിലീസ് ചെയ്തത്. ജ്യോതിക, മമ്മൂട്ടി എന്നിവർക്കൊപ്പം ലാലു അലക്സ്, ആർ.എസ്. പണിക്കർ, സുധി കോഴിക്കോട്, ചിന്നു ചാന്ദിനി, മുത്തുമണി തുടങ്ങി നിരവധി താരങ്ങളും അണിനിരക്കുന്നുണ്ട്. 13 വർഷത്തെ ഇടവേളയ്ക്ക് ശേഷം തമിഴ് നടി ജ്യോതിക മലയാളത്തിൽ അഭിനയിക്കുന്ന ചിത്രമാണ് കാതൽ. കൂടാതെ മമ്മൂട്ടിയും ജ്യോതികയും ആദ്യമായി ഒന്നിക്കുന്ന സിനിമ കൂടിയാണിത്.
ആദർശ് സുകുമാരനും പോൾസൺ സ്‌കറിയയുമാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. മമ്മൂട്ടി കമ്പനിയുടെ ബാനറിൽ മമ്മൂട്ടിയാണ് ചിത്രം നിർമ്മിച്ചിരിക്കുന്നത്. ഗോവയിൽ നടന്ന ഐഎഫ്എഫ്‌ഐയിൽ ചിത്രം പ്രദർശിപ്പിച്ചിരുന്നു. ഡിസംബർ 8 മുതൽ 15 വരെ നടക്കുന്ന കേരള രാജ്യാന്തര ചലച്ചിത്രമേളയിൽ മലയാളം സിനിമ ടുഡേ എന്ന വിഭാഗത്തിലും കാതൽ പ്രദർശിപ്പിക്കും.
