പ്രശസ്ത റേഡിയോ ജോക്കിയും ടെലിവിഷന്‍ അവതാരകനും സംവിധായകനുമായ ആര്‍ജെ മാത്തുക്കുട്ടി വിവാഹിതനായി. പെരുമ്പാവൂര്‍ സ്വദേശിയായ ഡോ.എലിസബത്ത് ഷാജി മഠത്തിലാണ് വധു. അടുത്ത ബന്ധുക്കളും സുഹൃത്തുക്കളും മാത്രമായിരുന്നു വിവാഹത്തില്‍ പങ്കെടുത്തത്. വൈകുന്നേരം നടന്ന വിവാഹറിസപ്ഷനിൽ വിനീത് ശ്രീനിവാസൻ ഉൾപ്പടെ നിരവധിപ്പേർ താരത്തിന് ആശംസകളുമായി എത്തിയിരുന്നു.
ഇരുവരുടേതും പ്രണയ വിവാഹമായിരുന്നുവെന്നും എലിസബത്ത് ചെറുപ്പം മുതൽക്കേ അറിയാവുന്ന അടുത്ത സുഹൃത്താണെന്നും വിവാഹശേഷം മാത്തുക്കുട്ടി പറഞ്ഞു. ഭാര്യയുടെ പേര് എലിസബത്ത് ഷാജി, അവൾ ഡോക്ടറാണ്. കാനഡയിലാണ് ജോലി ചെയ്യുന്നത്. ഞങ്ങൾ അയൽക്കാരാണ്. സൗഹൃദം പിന്നീട് ദൃഢമാകുകയും പ്രണയത്തിലേക്ക് എത്തുകയുമായിരുന്നു എന്ന് മാത്തുക്കുട്ടി കൂട്ടിച്ചേർത്തു.
അതേസമയം അരുണ്‍ മാത്യു എന്നാണ് മാത്തുക്കുട്ടിയുടെ യഥാര്‍ഥ പേര്. എന്നാൽ റേഡിയോ ജോക്കി ആയിരുന്നപ്പോള്‍ ഉള്ള ആര്‍ജെ മാത്തുക്കുട്ടി എന്ന പേരിലാണ് താരം പ്രശസ്തനായത്. ചാനല്‍ ഷോകളിലൂടെ അവതാരകനായി തിളങ്ങിയ മാത്തുക്കുട്ടി പിന്നീട് സിനിമകളിൽ ചെറിയ വേഷങ്ങളിലും അഭിനയിച്ചു. അവതാരകന്‍ കലേഷ് ദിവാകരനോടൊപ്പമുള്ള മാത്തു-കല്ലു എന്ന കൂട്ടുകെട്ടാണ് മാത്തുക്കുട്ടിയെ ഏറെ പ്രശസ്തനാക്കിയത്. 2015ല്‍ രൂപേഷ് പീതാംബരന്‍ സംവിധാനം ചെയ്ത യൂടൂ ബ്രൂട്ടസ് എന്ന ചിത്രത്തില്‍ സംഭാഷണം എഴുത്തിലും മാത്തുക്കുട്ടി പങ്കാളിയായിരുന്നു. തുടർന്ന് 2021ല്‍ ആസിഫ് അലിയെ നായകനാക്കി കുഞ്ഞെല്‍ദോ എന്ന സിനിമ സംവിധാനം ചെയ്തു.
