ആഗസ്റ്റ് ഒമ്പതിന് തിയറ്ററുകളിലെത്തിയ രജനികാന്ത് ചിത്രം ‘ജയിലർ’ വൻ വിജയമായിരുന്നു. 650 കോടിയാണ് ചിത്രം ബോക്സോഫീസിൽ നിന്ന് നേടിയത്. തിയറ്ററുകൾ ആഘോഷമാക്കിയ ‘ജയിലർ’ ഇപ്പോഴിതാ ടെലിവിഷനിൽ പുതിയൊരു നേട്ടം കൂടി സ്വന്തമാക്കിയിരിക്കുകയാണ്. വിവിധ ഭാഷകളിൽ ഓരേ സമയം ടെലിവിഷൻ പ്രീമിയർ നടത്തിയ ആദ്യ ഇന്ത്യൻ സിനിമയെന്ന നേട്ടമാണ് ചിത്രം നേടിയിരിക്കുന്നത്. ദീപാവലിയോട് അനുബന്ധിച്ചാണ് ചിത്രം ടെലിവിഷനിലെത്തിയത്.
തമിഴിൽ സൺ ടിവിയിലും, തെലുങ്കിൽ ജെമിനി ടിവിയിലും, കന്നഡയിൽ ഉദയ ടിവിയിലും, ഹിന്ദിയിൽ സ്റ്റാർ ഗോൾഡ് ഇന്ത്യ തുടങ്ങിയ ചാനലിലുമാണ് ചിത്രം പ്രീമിയർ ചെയ്തത്. രജനി ചിത്രം പ്രദർശിപ്പിച്ച ടെലിവിഷൻ ചാനലുകളുടെ ടി. ആർ.പി റേറ്റിംഗ് ഇതിനോടകം തന്നെ കൂടിയിട്ടുണ്ട്. 205 കോടിയാണ് തമിഴ്നാട്ടിൽ നിന്ന് മാത്രം ചിത്രം നേടിയത്. കേരളത്തിൽ നിന്ന് 58 കോടിയും ആന്ധ്ര- തെലങ്കാനയിൽ നിന്ന് 88 കോടിയുമാണ് ചിത്രം നേടിയത്. കർണാടകയിലെ കളക്ഷൻ 71 കോടി രൂപയാണ്. ഇന്ത്യയിലെ മറ്റ് സംസ്ഥാനങ്ങളിൽ നിന്ന് 17 കോടിയും ജയിലർ നേടിയിട്ടുണ്ട്. 195 കോടിയാണ് മറ്റുരാജ്യങ്ങളിൽ നിന്ന് ചിത്രം സ്വന്തമാക്കിയത്.
ജയിലറിൽ രജനിക്കൊപ്പം വൻ താരനിരയാണ് അണിനിരന്നത്. വില്ലൻ വേഷം അവതരിപ്പിച്ച മലയാളി താരം വിനായകൻ ഏറെ പ്രേക്ഷക പ്രീതി നേടിയിരുന്നു. ജാക്കി ഷ്‌റോഫ്, മോഹന്‍ലാല്‍, ശിവ രാജ്കുമാര്‍ തുടങ്ങിയ വമ്പന്‍ താരങ്ങളുടെ കാമിയോ റോളും ചിത്രത്തില്‍ ശ്രദ്ധ നേടി. സണ്‍ പിക്‌ചേഴ്‌സിന്റെ ബാനറില്‍ കലാനിധി മാരനാണ് ജയിലര്‍ നിര്‍മിച്ചത്. നിലവിൽ തലൈവര്‍ 170ന്‍റെ ഷൂട്ടിങ് തിരക്കിലാണ് രജനികാന്ത്. ടി ജെ ജ്ഞാനവേല്‍ സംവിധാനം ചെയ്യുന്ന ചിത്രത്തിൽ അമിതാഭ് ബച്ചന്‍, മഞ്ജുവാര്യര്‍, അര്‍ജുന്‍ സര്‍ജ, ഫഹദ് ഫാസില്‍ എന്നിങ്ങനെ വൻ താരനിരയാണ് അണിനിരക്കുന്നത്. 33 വര്‍ഷങ്ങള്‍ക്ക് ശേഷമാണ് അമിതാഭ് ബച്ചനും രജനികാന്തും സിനിമയിൽ ഒരുമിച്ച് അഭിനയിക്കുന്നത് എന്ന പ്രത്യേകതകൂടിയുണ്ട് ചിത്രത്തിന്.
