എൺപതുകളിലും തൊണ്ണൂറുകളിലും സുന്ദരിമാരുടെ മനസ് കവർന്ന നടനായിരുന്നു റഹ്മാൻ. ചോക്ലേറ്റ് ഹീറോ ആയിരുന്ന റഹ്മാൻ ഇല്ലാതെ ഒരു കാലത്ത് മലയാളത്തിൽ പ്രണയ സിനിമകൾ ഇല്ലായിരുന്നു എന്ന് പറഞ്ഞാലും അതിൽ അതിശയോക്തിയില്ല. കാലമിത്ര കഴിഞ്ഞിട്ടും അതേ സൗന്ദര്യം നിലനിർത്തുന്ന റഹ്മാന്റെ പുതിയ വീഡിയോയാണ് സാമൂഹ്യമാധ്യമങ്ങളിൽ വൈറലാകുന്നത്. തന്റെ കൊച്ചുമകൻ്റെ തലയിൽ ഹെയർ സ്റ്റൈൽ പരീക്ഷണം നടത്തുന്ന മുത്തച്ഛനായാണ് റഹ്മാൻ പ്രത്യക്ഷപ്പെട്ടിരിക്കുന്നത്.
റഹ്മാന്റെ മകൾ മുഷ്ദയുടെ മകൻ അയാന്റെ തലമുടിയിലാണ് താരം പരീക്ഷണം നടത്തുന്നത്. കുഞ്ഞിന്റെ തലമുടി റഹ്മാൻ കൈകൾ ഉപയോഗിച്ച് സ്പൈക് മോഡലിൽ ഒരുക്കുന്നതാണ് വീഡിയോയിൽ കാണാൻ സാധിക്കുന്നത്. സ്പൈക് ഹെയർസ്‌റ്റൈൽ പൂർത്തിയാക്കിയതിന് ശേഷം കൊച്ചുമകനുമൊത്ത് വീഡിയോയ്ക്ക് പോസ് ചെയ്യുന്നുമുണ്ട് താരം. വീഡിയോ പങ്കുവെച്ച് നിമിഷനേരത്തിനുള്ളിൽ സംഭവം വൈറലാകുകയും ചെയ്തു. വർഷങ്ങൾ കഴിയുംതോറും റഹ്മാൻ ചെറുപ്പമാകുകയാണെന്നാണ് ഭൂരിപക്ഷം പേരും അഭിപ്രായപ്പെടുന്നത്.
നിരവധി പേരാണ് രസകരമായ കമന്റുകളുമായി എത്തുന്നത്. സിനിമയിൽ സജീവമാണെങ്കിലും തന്റെ കുടുംബത്തിന് വേണ്ടി സമയം കണ്ടെത്താറുള്ള റഹ്മാൻ കുടുംബാംഗങ്ങളോടൊപ്പമുള്ള വീഡിയോകൾ സാമൂഹ്യമാധ്യമങ്ങളിലൂടെ പങ്കുവെയ്ക്കാറുമുണ്ട്. താരത്തിന്റെ കുടുംബ വിശേഷങ്ങൾ ആരാധകരും വളരെ ആവേശത്തോടെയാണ് ഏറ്റെടുക്കുന്നത്.
