അനന്ത് അംബാനി – രാധിക മെർച്ചൻ്റ് വിവാഹച്ചടങ്ങിൽ പങ്കെടുത്ത് സൂപ്പർ താരം പൃഥ്വിരാജും സുപ്രിയയും. മലയാള സിനിമയിൽ നിന്നും പൃഥ്വിരാജ് മാത്രമാണ് ആർഭാട വിവാഹത്തിൽ പങ്കെടുത്തത് എന്നത് ശ്രദ്ധേയമാണ്.
ക്രീം - ഗോൾഡൻ നിറത്തിലുള്ള കുർത്തയായിരുന്നു പൃഥ്വിരാജ് ധരിച്ചിരുന്നത്. അതേ നിറത്തിലുള്ള സാരിയായിരുന്നു സുപ്രിയയുടെ വേഷം. വിവാഹവേദിയിലെ ഇരുവരുടെയും ചിത്രങ്ങൾ ശ്രദ്ധേയമാണ്. ഇതിനിടെ സുപ്രിയ പകർത്തിയ ഒരു സെൽഫി സാമൂഹ്യ മാധ്യമങ്ങളിൽ വൈറലാകുകയാണ്. കാരണം സെൽഫിയിൽ പൃഥ്വിരാജിനൊപ്പം ഇടം നേടിയിരിക്കുന്നത് ഇന്ത്യൻ ക്രിക്കറ്റ് ടീമിലെ സൂപ്പർ താരം ജസ്പ്രീത് ബുമ്രയാണ്. സിനിമാ-ക്രിക്കറ്റ് ആരാധകർ ഒരുപോലെ സ്വീകരിച്ചിരിക്കുകയാണ് ഈ ചിത്രം.
താരസമ്പന്നമായ അംബാനി വിവാഹത്തിൽ ഹോളിവുഡ്, ബോളിവുഡ് തുടങ്ങി ലോകമെമ്പാടുമുള്ള താരങ്ങൾ അതിഥികളായെത്തി. തമിഴിൽ നിന്നും രജനികാന്ത്, സൂര്യ, നയൻതാര, അറ്റ്ലി എന്നിവർ കുടുംബസമേതം വിവാഹത്തിൽ പങ്കെടുത്തിരുന്നു. ഹിന്ദിയിൽ നിന്ന് അമിതാഭ് ബച്ചൻ, ഷാറൂഖ് ഖാൻ, സൽമാൻ ഖാൻ, ആമിർ ഖാൻ, കരൺ ജോഹർ, രൺബീർ കപൂർ, ആലിയ ഭട്ട്, അനിൽ കപൂർ, മാധുരി ദീക്ഷിത്, വിദ്യാ ബാലൻ, കിം കർദാഷിയാൻ, സഹോദരി ക്ലോയി കർദാഷിയാൻ തുടങ്ങിയവരും എത്തിയിരുന്നു.
