പ്രേക്ഷകർ ഏറെ നാളായി കാത്തിരിക്കുന്ന ചിത്രമാണ് പൃഥ്വിരാജ്- ബ്ലെസി ടീമിന്റെ ആട് ജീവിതം. ബെന്യാമിന്റെ പ്രശസ്ത നോവലിനെ അടിസ്ഥാനമാക്കിയുള്ള ചിത്രം വർഷങ്ങളുടെ പരിശ്രമങ്ങളിലൂടെയും കഠിനാധ്വാനത്തിലൂടെയുമാണ് അണിയറയിൽ ഒരുങ്ങുന്നത്. ഇപ്പോൾ ആട് ജീവിതത്തിന്റെ ഔദ്യോഗിക പോസ്റ്റർ പുറത്തുവിട്ടിരിക്കുകയാണ് പൃഥ്വിരാജ്. നിശ്വാസങ്ങളെല്ലാം പോരാട്ടമാണ് എന്ന ടാഗ് ലൈനോടെയാണ്
താരം പോസ്റ്റർ പങ്കുവെച്ചിരിക്കുന്നത്.
സൗദി അറേബ്യയിലെ ഇന്ത്യൻ കുടിയേറ്റ തൊഴിലാളിയായ നജീബ് എന്ന കഥാപാത്രത്തെയാണ് ചിത്രത്തിൽ പൃഥ്വിരാജ് അവതരിപ്പിക്കുന്നത്. ബ്ലെസി-പൃഥ്വിരാജ് ടീമിന്റെ സ്വപ്നപദ്ധതിയാണ് ആട് ജീവിതമെന്ന ചിത്രം. ചിത്രത്തിന് വേണ്ടി വലിയൊരു മേക്കോവർ തന്നെയാണ് പൃഥ്വിരാജ് തന്റെ ശരീരത്തിൽ വരുത്തിയിരിക്കുന്നത്.
മാജിക് ഫ്രെയിംസാണ് സിനിമ വിതരണത്തിനെത്തിക്കുന്നത്. പാൻ ഇന്ത്യൻ ചിത്രമായാണ് ആട് ജീവിതം റിലീസ് ചെയ്യുന്നത്. പൃഥ്വിരാജിനെ കൂടാതെ അമല പോളും ശോഭ മോഹനുമാണ് ചിത്രത്തിൽ മലയാളത്തിൽ നിന്നുള്ള മറ്റുതാരങ്ങൾ. എ.ആർ. റഹ്മാനാണ് ചിത്രത്തിന്റെ സംഗീത സംവിധാനം നിർവ്വഹിച്ചിരിക്കുന്നത്.
