ക്രിസ്തുമസ് റിലീസായി തിയേറ്ററിലെത്തിയ സലാർ ബോക്സ് ഓഫീസിൽ ഹിറ്റാകുന്നു. പ്രഭാസ് – പൃഥ്വിരാജ് ബ്രഹ്‌മാണ്ഡ ചിത്രം ദിവസങ്ങൾക്കകം 500 കോടി ക്ലബ്ബിലാണ് ചിത്രം ഇടംനേടിയത്. ആഗോള തലത്തിൽ റിലീസ് ആയ എല്ലാ കേന്ദ്രങ്ങളിൽ നിന്നുമായാണ് ഈ റെക്കോർഡ് കലക്ഷൻ ചിത്രം സ്വന്തമാക്കിയതെന്ന് അണിയറ പ്രവർത്തകർ വ്യക്തമാക്കി.
ഹോംബാലെ ഫിലിംസിൻ്റെ ബാനറിൽ പ്രശാന്ത് നീൽ ഒരുക്കിയ ചിത്രമാണ് സലാർ. മാസ് ആക്ഷൻ രംഗങ്ങളാലും ഇമോഷണൽ ഡ്രാമയാലും ആരാധകർക്കിടയിൽ ആവേശമായി മാറുകയാണ് സലാർ. ദേവയായി പ്രഭാസും, വരദരാജ മന്നാർ ആയി പൃഥ്വിരാജും എത്തുന്ന സലാർ രണ്ട് സുഹൃത്തുക്കളുടെ കഥയാണ് പറയുന്നത്. പിന്നീട് ഇരുവരും കടുത്ത ശത്രുക്കളായി മാറുന്നതിലേക്കാണ് ‘സലാർ പാർട്ട് 1 സീസ് ഫയർ’ എന്ന ആദ്യ ഭാഗം പ്രേക്ഷകരെ എത്തിക്കുന്നത്.
തമിഴ്, ഹിന്ദി, മലയാളം, തെലുങ്ക്, കന്നഡ എന്നിങ്ങനെ അഞ്ച് ഭാഷകളിൽ റിലീസ് ചെയ്യുന്ന ചിത്രത്തിൽ ശ്രുതി ഹാസൻ, ജഗപതി ബാബു, ബോബി സിംഹ, ടിന്നു ആനന്ദ്, ഈശ്വരി റാവു, ശ്രീയ റെഡ്ഡി, രാമചന്ദ്ര രാജു എന്നിവരാണ് മറ്റ് അഭിനേതാക്കൾ. കേരളത്തിലെ തിയേറ്ററുകളിൽ ചിത്രം വിതരണത്തിനെത്തിച്ചിരിക്കുന്നത് പൃഥ്വിരാജ് പ്രൊഡക്ഷൻസും മാജിക് ഫ്രെയിംസും ചേർന്നാണ്.
