65-ാ മത് കേരള സംസ്ഥാന സ്‌കൂൾ കായികോത്സവം സമാപിച്ചു. ഈ വർഷത്തെ സംസ്ഥാന സ്‌കൂൾ കായികമേളയിൽ ഹാട്രിക് കിരീട നേട്ടവുമായി പാലക്കാട്. മലപ്പുറത്തെ പിന്തള്ളിയാണ് പാലക്കാട് ഹാട്രിക് കിരീടം ചൂടുന്നത്. മുൻ വർഷങ്ങളിലായി കണ്ണൂരിലും തിരുവനന്തപുരത്തും നടന്ന സ്‌കൂൾ മീറ്റിലും പാലക്കാട് കിരീട ജേതാക്കളായിരുന്നു.
നിലവിലെ ചാമ്പ്യന്മാരായ പാലക്കാട് 231 പോയിന്റോടെയാണ് കിരീടം നിലനിർത്തി. 151 പോയന്റാണ് രണ്ടാം സ്ഥാനത്ത് എത്തിയ മലപ്പുറം നേടിയത്. അതേസമയം സ്‌കൂളുകളിൽ നിലവിലെ ചാമ്പ്യൻമാരായ ഐഡിയൽ കടകശ്ശേരി 57 പോയിന്റുമായി കിരീടം നിലനിർത്തി. മാർബേസിൽ കോതമംഗലത്തെ അവസാന നിമിഷം പിന്നിലാക്കിയാണ് ഐഡിയൽ കടകശ്ശേരിയുടെ കിരീടം നിലനിർത്തിയത്. കഴിഞ്ഞ വർഷം ഏഴു സ്വർണം നേടിയ ഐഡിയൽ ഇത്തവണ അഞ്ചു സ്വർണമാണ് സ്വന്തമാക്കിയത്.
87 പോയിന്റോടെ എറണാകുളം മൂന്നാം സ്ഥാനത്തും 73 പോയിന്റുമായി കോഴിക്കോട് നാലാം സ്ഥാനത്തുമാണുള്ളത്. വിജയ കിരീടത്തിന് ഇരട്ടി മധുരമായി സീനിയർ പെൺകുട്ടികളുടെ 200 മീറ്ററിലെ സ്വർണ നേട്ടത്തിന് പിന്നാലെ പാലക്കാടിന്റെ ജ്യോതിക എം ട്രിപ്പിളടിക്കുകയും ചെയ്തു.
