ഓസ്കര്‍ പുരസ്കാരത്തിനുള്ള നാമനിര്‍ദേശ പ്രഖ്യാപനം ഇന്ന്. ഇന്ത്യയിൽ നിന്ന് ആര്‍.ആര്‍.ആര്‍ ഉള്‍പ്പടെ നാല് ചിത്രങ്ങളാണ് വിവിധ വിഭാഗങ്ങളിലായി നാമനിര്‍ദേശത്തിനായി ഷോര്‍ട് ലിസ്റ്റ് ചെയ്തിരിക്കുന്നത്. വൈകുന്നേരം ഏഴുമണിക്കാണ് നാമനിർദേശ പ്രഖ്യാപന ചടങ്ങ്. ഒരു നൂറ്റാണ്ടോളം നീണ്ട ഓസ്കര്‍ ചരിത്രത്തില്‍ ഇന്ത്യ ഇത്രയധികം പ്രതീക്ഷയോടെ പ്രഖ്യാപനത്തിനായി കാത്തിരിക്കുന്നത് ഇതാദ്യമാണ്. ഗോള്‍ഡന്‍ ഗ്ലോബ് നേടിയ രാജമൗലി ചിത്രം ആര്‍.ആര്‍.ആര്‍ ആണ് ഇന്ത്യയുടെ പ്രതീക്ഷ. ഒറിജിനല്‍ സോങ് വിഭാഗത്തിൽ നാട്ടു നാട്ടു എന്ന പാട്ടാണ് ഷോര്‍ട് ലിസ്റ്റ് ചെയ്യപ്പെട്ടിരിക്കുന്നത്.
ഇൻ്റര്‍നാഷ്ണല്‍ ഫീച്ചര്‍ ഫിലിം വിഭാഗത്തില്‍ പാന്‍ നളിൻ്റെ ഗുജറാത്തി ചിത്രം ‘ചെല്ലോ ഷോ’ , ഡോക്യുമെൻ്ററി ഫീച്ചര്‍ ഫിലിം വിഭാഗത്തില്‍ ‘ഓള്‍ ദ ബ്രത്ത്സ്’, ഡോക്യുമെൻ്ററി ഷോര്‍ട് ഫിലിം വിഭാഗത്തില്‍ ‘ദി എലെഫന്റ് വിസ്പേഴ്സും’ എന്നിവയ്ക്കും ഓസ്കര്‍ നാമനിര്‍ദേശത്തിന് സാധ്യതയുണ്ട്.
‘ദി ഫേബള്‍മാന്‍സ്’, ‘ട്രയാങ്കിള്‍ ഓഫ് മാഡ്നസ്’, ‘ദ ബാന്‍ഷീസ് ഓഫ് ഇനിഷെറിന്‍’ എന്നിവയ്ക്ക് നാമനിര്‍ദേശ പട്ടികയില്‍ മുൻനിര ലഭിക്കുമെന്നാണ് സൂചന. ജെയിംസ് കാമറൂണിൻ്റെ ‘അവതാര്‍ ദി വെ ഓഫ് വാട്ടര്‍’, ടോം ക്രൂസിൻ്റെ ‘ടോപ് ഗണ്‍ മാവെറിക്’ എന്നിവയും മികച്ച ചിത്രമാകാന്‍ മല്‍സരിക്കുന്നുണ്ട്. ഒരാഴ്ച നീണ്ട വോട്ടെടുപ്പ് കഴിഞ്ഞ ചൊവ്വാഴ്ച അവസാനിച്ചിരുന്നു.
സാമുവല്‍ ഗോള്‍ഡ്‍വിന്‍ തിയറ്ററിൽ നടക്കുന്ന ചടങ്ങില്‍ അലിസന്‍ വില്യംസും റിസ് അഹ്മദും ചേര്‍ന്ന് 23 വിഭാഗങ്ങളിലെ നാമനിര്‍ദേശ പട്ടിക പ്രഖ്യാപിക്കും. മാര്‍ച്ച് 12നാണ് ഓസ്കര്‍ പുരസ്കാര പ്രഖ്യാപനം നടക്കുക.
