റഹ്മാനെയും ധ്യാൻ ശ്രീനിവാസനെയും ഷീലു ഏബ്രഹാമിനെയും പ്രധാന കഥാപാത്രങ്ങളാക്കി ഒമർ ലുലു സംവിധാനം ചെയ്യുന്ന പുതിയ ചിത്രത്തിന്റെ ടൈറ്റിൽ പോസ്റ്റർ പുറത്തുവിട്ടു. ‘ബാഡ് ബോയ്സ്’ എന്നാണ് ചിത്രത്തിന് നൽകിയിരിക്കുന്ന പേര്. ചിത്രത്തിന്റെ ടൈറ്റിൽ ലോഞ്ച് എഴുപുന്നയിൽ വച്ച് നടന്നു. തീർത്തും കോമഡി ഫൺ എന്റർടെയ്നറായ ചിത്രം അബാം മൂവീസിന്റെ ബാനറിൽ ഷീലു എബ്രഹാം അവതരിപ്പിച്ച് എബ്രഹാം മാത്യുവാണ് നിർമിക്കുന്നത്. അബാം മൂവിസിന്റെ പതിനഞ്ചാമത്തെ ചിത്രമാണിത്.
ബാബു ആന്റണി, ബിബിൻ ജോര്‍ജ്, അജു വർഗീസ്, ഹരിശ്രീ അശോകൻ, രമേഷ് പിഷാരടി, ശരത് സഭ, ആൻസൺ പോൾ, സെന്തിൽ കൃഷ്ണ, ടിനി ടോം, രവീന്ദ്രൻ, മല്ലിക സുകുമാരൻ എന്നിവരാണ് ചിത്രത്തിലെ മറ്റ് അഭിനേതാക്കള്‍. അഡാർ ലൗ എന്ന ഒമർ ചിത്രത്തിന്റെ തിരക്കഥാകൃത്ത് സാരംഗ് ജയപ്രകാശ് തന്നെയാണ് ബാഡ് ബോയ്സിന്റെയും തിരക്കഥ ഒരുക്കുന്നത്. ഒമറിന്റേതാണ് കഥ. ജോസഫ് നെല്ലിക്കൽ കലാസംവിധാനം നിർവഹിക്കുന്ന ചിത്രത്തിൻ്റെ ഛായാഗ്രഹണം ആൽബിയാണ് നിർവഹിക്കുന്നത്. അമീർ കൊച്ചിൻ, ഫ്ലെമി എബ്രഹാം എന്നിവരാണ് എക്സിക്യൂട്ടീവ് പ്രൊഡ്യൂസേഴ്സ്.
ഗാനരചന നിർവഹിക്കുന്നത് ബി.കെ ഹരിനാരായണനാണ്. ചിത്രത്തിലെ ഗാനങ്ങൾക്ക് സംഗീതം നൽകുന്നത് വില്യം ഫ്രാൻസിസ്. എഡിറ്റർ ദീലീപ് ഡെന്നീസ്, കാസ്റ്റിങ് നിർവഹിക്കുന്നത് വിശാഖ് പി.വിയാണ്. മേക്കപ്പ് നിർവഹിക്കുന്നത് ജിതേഷ് പൊയ്യ, കോസ്റ്റ്യൂംസ് അരുൺ മനോഹറിന്റേതാണ്.
