മലയാളം സിനിമാ പ്രേക്ഷകരുടെ ഇഷ്ടതാരമാണ് നവ്യ നായർ. കലോത്സവ വേദിയിൽ നിന്നും അഭിനയരംഗത്തേയ്ക്കെത്തിയ താരത്തിന്റെ സിനിമകളെല്ലാം ഒന്നിനൊന്ന് മികച്ചതുമായിരുന്നു. ഇപ്പോൾ തന്റെ ജീവിതത്തിൽ നേരിട്ട ഒരു ദുരനുഭവം അരാധകരുമായി പങ്കിട്ടിരിക്കുകയാണ് താരം. കുടുംബത്തിൽ തന്നെയുള്ള ഒരു കുഞ്ഞിനെ താലോലിക്കാൻ ശ്രമിച്ചപ്പോൾ കേൾക്കേണ്ടിവന്ന വേദനാജനകമായ വാക്കുകളേക്കുറിച്ചാണ് നവ്യ മനസുതുറന്ന് സംസാരിച്ചത്.
വളരെ കാലത്തിന് ശേഷം പരിചയം പോലുമില്ലാത്ത ഒരു കുഞ്ഞിനെ ലാളിക്കാൻ കിട്ടിയ നിമിഷത്തേക്കുറിച്ച് സംസാരിച്ചപ്പോഴാണ് നവ്യ പഴയ കാലത്തുണ്ടായ അനുഭവം ഓർത്തെടുത്തത്. കുഞ്ഞിനെ കയ്യിലെടുത്ത് ചുംബിച്ചപ്പോൾ കുഞ്ഞിന്റെ അമ്മയിൽ നിന്നും നേരിടേണ്ടി വന്നത് വളരെ മോശം പ്രതികരണമായിരുന്നുവെന്നും അന്ന് കണ്ണീരോടെ മടങ്ങിയ താൻ പിന്നീട് മറ്റ് കുഞ്ഞുങ്ങളെ ഓമനിക്കുന്ന ശീലം ഉപേക്ഷിച്ചുവെന്നുമാണ് നവ്യ പറഞ്ഞത്. ഒരു പെൺകുഞ്ഞിനെ എടുത്ത് ഓമനിക്കുന്ന വീഡിയോ ഇൻസ്റ്റഗ്രാമിൽ പങ്കുവച്ചുകൊണ്ടായിരുന്നു താരത്തിന്റെ പ്രതികരണം.
“പഴയപോലെ കുട്ടികളെ എടുത്ത് കൊഞ്ചിക്കാറില്ലായിരുന്നു. എന്റെ തന്നെ കുടുംബത്തിലെ കുട്ടിയായിരുന്നു, പുറത്തുവളർന്നതുകൊണ്ട് അവളുടെ വർത്തമാനം ഇംഗ്ലീഷും മലയാളവും കുഴകുഴഞ്ഞു കേൾക്കാൻ നല്ല രസമായിരുന്നു. അവൾക്കെന്നെ ഇഷ്ടമായി ഞങ്ങൾ കുറെ കുശലങ്ങൾ പറഞ്ഞു. പോരുന്ന നേരം അവൾക്കൊരു ഉമ്മ കൊടുത്തു. കവിളിലും നെറ്റിയിലും ചുണ്ടിലും, ക്ഷുഭിതയായ അവളുടെ അമ്മ, അന്യരെ ഉമ്മ വയ്ക്കാൻ അനുവദിക്കരുതെന്ന് നിന്നോട് പറഞ്ഞിട്ടില്ലേ എന്ന് കുട്ടിയോട് ചോദിച്ച് ശകാരിച്ചു.
ഒരു നിമിഷം ഞാൻ സ്‌തബ്‌ദയായിപ്പോയി. അവളുടെ അച്ഛനും ഞാനും ഒരു വീട്ടിൽ ഉണ്ടും ഉറങ്ങിയും വളർന്നവരാണ്, രക്തബന്ധം ഉള്ളവരാണ്. എൻ്റെ കണ്ണുകൾ നിറഞ്ഞു ഒന്നും പറയാതെ വിടവാങ്ങി. അതിനു ശേഷം കൂഞ്ഞുങ്ങളോടുള്ള അമിത സ്നേഹപ്രകടനത്തിനൊരു ഇളവ് വരുത്തി. പക്ഷേ ഇവൾ എന്നെ വശീകരിച്ചു. താജ്‌മഹലോളം തന്നെ. പേരറിയാത്ത മാതാപിതാക്കളെ ഞാൻ അവളെ വാരിപ്പുണരുമ്പോൾ നിങ്ങളുടെ മുഖത്ത് കണ്ട ആ സന്തോഷം എന്നെ ധന്യയാക്കി. വാവേ നിന്റെ പേര് ചോദിച്ചു, എങ്കിലും ഈ ആൻ്റി മറന്നു, കാണുകയാണെങ്കിൽ കമന്റ് ബോക്സിൽ പേര് ഇടണം, അതുവരെ ഇവളെ മാലാഖ എന്ന് വിളിക്കട്ടെ” എന്നാണ് നവ്യ നായർ കുറിച്ചത്.
പിന്നീട് കുഞ്ഞിൻ്റെ പേര് കിട്ടി എന്നും അമാൽ ഇനാരാ എന്നാണെന്നും നവ്യ കുറിച്ചു. നവ്യ കുഞ്ഞിനെ ലാളിക്കുന്ന വീഡിയോയും കുറിപ്പും സാമൂഹ്യമാധ്യമങ്ങളിൽ വൈറലായിട്ടുണ്ട്.
