ഓസ്കർ വേദിയിൽ ഗായകരായ രാഹുൽ സിപ്ലിഗഞ്ചും കാലഭൈരവയും ലൈവായി പാട്ട് പാടിയപ്പോൾ ചുവടുകളുമായി നര്‍ത്തകരും വിസ്മയിപ്പിച്ചു. ഇരുപതോളം പേരാണ് ഒറിജിനലിനെ വെല്ലും വിധം വേദിയിൽ ചുവടുവച്ചത്. ആർആർആറിലെ ഗാനരംഗം അനുകരിച്ചായിരുന്നു ഓസ്കർ വേദിയിലെയും ചുവടുകൾ. വസ്ത്രധാരണത്തിലും നർത്തകർ പാട്ടിനെ അനുകരിച്ചു. രണ്ടു മിനിറ്റിലേറെ നീണ്ടു നിന്ന ഈ പ്രകടനം പ്രേക്ഷകരെ ആവേശത്തിലാറാടിച്ചു. പ്രകടനത്തിനൊടുവിൽ വേദിയിലും സദസ്സിലുമുള്ളവർ എഴുന്നേറ്റു നിന്ന് കയ്യടിച്ചു. ഇന്ത്യയുടെ അഭിമാനമായ നടി ദീപിക പദുക്കോൺ ആണ് നാട്ടു നാട്ടു അവതരിപ്പിക്കാൻ ഗായകരെയും നർത്തകരെയും ഓസ്കർ വേദിലേക്കു സ്വാഗതം ചെയ്തത്.
എം.എം.കീരവാണിയുടെ താളവും ഈണവും രാം ചരണിൻ്റെയും ജൂനിയർ എൻടിആറിൻ്റെയും തകർപ്പൻ ചുവടുകളും കൊണ്ട് ലോക ശ്രദ്ധ നേടിയ രാജമൗലി ചിത്രം ആർആർആറിലെ ‘നാട്ടു നാട്ടു’ എന്ന ഗാനം. നാട്ടു നാട്ടുവിന് അക്കാദമി അവാർഡ് ലഭിച്ചത് ഇന്ത്യയ്ക്ക് പുതുചരിത്രമായി. ഒറിജിനൽ സോങ് വിഭാഗത്തിലാണ് പാട്ടിന് പുരസ്കാരം ലഭിച്ചത്. ആർആർആറിൻ്റെ സംവിധായകൻ എസ്.എസ്.രാജമൗലിയും രാം ചരൺ, ജൂനിയർ എൻടിആർ എന്നിവരുൾപ്പെടെയുള്ളവർ ഡോൾബി തീയറ്ററിലെത്തിയിരുന്നു.
