എംവിആര്‍ പുരസ്കാരം നടൻ മമ്മൂട്ടിയ്ക്ക്. മുന്‍മന്ത്രിയും സിഎംപി സ്ഥാപക നേതാവുമായ എം.വി രാഘവന്റെ പേരിൽ ഏർപ്പെടുത്തിയിട്ടുള്ള പുരസ്‌കാരമാണിത്. ഒരു ലക്ഷം രൂപയും പ്രശസ്തിപത്രവും അടങ്ങുന്ന പുരസ്കാരം ഡിസംബറിൽ കൊച്ചിയില്‍ വച്ച് നടക്കുന്ന ചടങ്ങില്‍ താരത്തിന് സമ്മാനിക്കുമെന്ന് സംഘാടകർ അറിയിച്ചു.
എംവി. രാഘവന്റെ ഒമ്പതാം ചരമ വാര്‍ഷികം വ്യാഴാഴ്ച ആചരിക്കും. രാവിലെ ഒമ്പത് മണിക്ക് പയ്യാമ്പലം എംവിആര്‍ സമൃതി മണ്ഡപത്തില്‍ നടക്കുന്ന പുഷ്പാര്‍ച്ചനയ്ക്ക് പാട്യം രാജനും എംവിആറിന്റെ കുടുംബാംഗങ്ങളും നേതൃത്വം നല്‍കും.
10 മണിയ്ക്ക് കണ്ണൂർ ചേംബര്‍ ഹാളില്‍ നടക്കുന്ന അനുസ്മരണ സമ്മേളനം മന്ത്രി വിഎന്‍. വാസവന്‍ ഉദ്ഘാടനം ചെയ്യും. ശേഷം പി.കെ. കുഞ്ഞാലിക്കുട്ടി മുഖ്യപ്രഭാഷണം നടത്തും. വാർത്താ സമ്മേളനത്തില്‍ ഭാരവാഹികളായ പ്രഫ. ഇ. കുഞ്ഞിരാമന്‍, സി.വി. ശശീന്ദ്രന്‍, പി.വി. വത്സൻ എന്നിവർ പങ്കെടുത്തു.
