തന്റെ ആരാധകർക്ക് എപ്പോഴും പ്രത്യേക പരിഗണന നൽകുന്നയാളാണ് കൂൾ ക്യാപ്റ്റൻ ധോണി. രാജ്യാന്തര ക്രിക്കറ്റിൽ നിന്ന് വിരമിച്ചെങ്കിലും ആരാധകർക്കിടയിൽ എന്നും മുൻപന്തിയിലാണ് മുൻ ക്യാപ്റ്റൻ എം.എസ് ധോണിയുടെ സ്ഥാനം. സഹതാരങ്ങളോടും തന്റെ ആരാധകരോടും കളിക്കളത്തിലും പുറത്തുമുള്ള ധോണിയുടെ പെരുമാറ്റം ഇതിനോടകം പ്രശംസ നേടിയിട്ടുള്ളതുമാണ്.
ഇപ്പോൾ ധോണിയുടെ പുതിയൊരു വീഡിയോ ആണ് സാമൂഹ്യ മാധ്യമങ്ങളിൽ വൈറലായിരിക്കുന്നത്. തന്റെ ആരാധകൻ്റെ പിറന്നാളിന് അയാളുടെ വീട്ടിലെത്തിയാണ് ധോണി സർപ്രൈസ് നൽകിയത്. ‘ഭൂമിയിലെ ഏറ്റവും വലിയ ഭാഗ്യവാൻ’ എന്ന അടിക്കുറിപ്പോടെ പങ്കുവച്ച പിറന്നാൾ ആഘോഷത്തിന്റെ ദൃശ്യങ്ങൾ ഇതിനോടകം വൈറലാകുകയും ചെയ്തു.
ആരാധകനും അയാളുടെ കുടുംബത്തിനും സുഹൃത്തുക്കൾക്കുമൊപ്പം ധോണി കേക്ക് പങ്കുവയ്ക്കുന്നതും ദൃശ്യങ്ങളിൽ കാണാം. നിരവധി പേരാണ് ധോണിയുടെ നല്ല മനസിനെ അഭിനന്ദിച്ച് കമൻ്റിടുന്നത്. തന്റെ ആരാധകന് നൽകാൻ കാഴിയുന്ന ഏറ്റവും വലിയ സമ്മാനം എന്നാണ് ചിലർ കുറിച്ചത്. ഇതിന് മുമ്പും തന്റെ ആരാധകരോടൊപ്പം താരജാഡയില്ലാതെ ധോണി ഇടപഴകുന്ന നിരവധി ദൃശ്യങ്ങൾ പുറത്തുവന്നിരുന്നു.
