പുഷ്പ 2-വിനായി കാത്തിരിക്കുന്ന പ്രേക്ഷകരെ ആവേശത്തിലാഴ്ത്താൻ ട്രെയ്‌ലര്‍ എത്തുന്നു. നവംബർ 17-നാണ് ചിത്രത്തിന്റെ ട്രെയിലർ റിലീസ് ചെയ്യുക. ഡിസംബർ അഞ്ചിനാണ് സിനിമ തിയേറ്ററുകളിലെത്തുക. ഇതിന് മുന്നോടിയായാണ് സിനിമയുടെ ട്രെയിലർ പുറത്തുവരുന്നത്.
17-ന് വൈകിട്ട് 6.03-ന് പട്‌നയിൽ വെച്ചാണ് ആഘോഷമായ ട്രെയിലർ റിലീസിങ് ചടങ്ങ് നടക്കുക. തെലുങ്കാനയ്ക്ക് പുറമെ കേരളത്തിലും ചിത്രത്തിനായി ആരാധകർ കാത്തിരിക്കുകയാണ്. സിനിമ ഇറങ്ങുന്നതിന് ഒരു മാസം മുമ്പേ കേരളത്തിലെ പുഷ്പ 2 ഫാൻസ് ഷോ ടിക്കറ്റുകൾ വിറ്റ് തീർന്നതായാണ് റിപ്പോർട്ട്. ‘പുഷ്പ ദ റൂൾ’ ഡിസംബർ അഞ്ച് മുതൽ കേരളക്കരയിലെ തിയേറ്ററുകളിൽ 24 മണിക്കൂറും പ്രദർശനമുണ്ടാകും. കേരളത്തിൽ ചിത്രം പ്രദർശനത്തിന് എത്തിക്കുന്നത് ഇ ഫോർ എൻ്റർടെയ്ൻമെൻ്റ്സ് ആണ്.
സുകുമാർ സംവിധാനം ചെയ്‌ത ‘പുഷ്പ ദ റൈസ്’ ആദ്യഭാഗം രണ്ട് ദേശീയ ചലച്ചിത്ര പുരസ്‌കാരങ്ങളും 7 സംസ്ഥാന ചലച്ചിത്ര പുരസ്‌കാരങ്ങളും നേടിയിരുന്നു. ‘പുഷ്പ ദ റൂൾ’ ഇതിൻ്റെ തുടർച്ചയായെത്തുമ്പോൾ സകല റെക്കോർഡുകളും തകർക്കുമെന്നാണ് സിനിമാ പ്രേമികളുടെ കണക്കൂകൂട്ടൽ.
