മലയാളത്തിന് അഭിമാനമായി ഹോളിവുഡ് മ്യൂസിക് ഇൻ മീഡിയ അവാർഡ് പട്ടികയിൽ ഇടംനേടി ആടുജീവിതം സിനിമയിലെ ഗാനം. എ.ആർ.റഹ്മാന്റെ ‘പെരിയോനേ’ എന്ന ഗാനമാണ് ലോക പ്രശസ്തമായ ഹോളിവുഡ് മ്യൂസിക് ഇൻ മീഡിയ പുരസ്കാരങ്ങൾക്കായുള്ള നാമനിർദേശ പട്ടികയിൽ സ്ഥാനം നേടിയത്.
ഫീച്ചർ ഫിലിം വിഭാഗത്തിലാണ് ‘പെരിയോനേ’യും മത്സരിക്കുന്നത്. ഈ മാസം 20-ന് ഹോളിവുഡിലെ അവലോണിലാണ് പുരസ്‌കാര വിതരണ ചടങ്ങ് നടക്കുക. എ.ആർ.റഹ്മാനും റഫീഖ് അഹമ്മദും ചേർന്നാണ് ഗാനം രചിച്ചിരിക്കുന്നത്. ജിതിൻ രാജ് ആണ് ഗാനം ആലപിച്ചിരിക്കുന്നത്.
മലയാളത്തിലെ ഒരു ഗാനത്തിനും എത്താൻ കഴിയാതിരുന്ന ഒരു നേട്ടത്തിനരികെ എത്തിയിരിക്കുകയാണ് ഇപ്പോൾ ഈ ഗാനം. എ.ആർ.റഹ്മാൻ്റെ മലയാളത്തിലേക്കുള്ള മടങ്ങിവരവ് ആഘോഷമാക്കിയ ചിത്രമായിരുന്നു പൃഥ്വിരാജിനെ നായകനാക്കി ബ്ലെസി സംവിധാനം ചെയ്ത ആടുജീവിതം.
