സുരേഷ് ഗോപി തന്റെ താടി വടിച്ച് പുതിയ ലുക്കിൽ പ്രത്യക്ഷപ്പെട്ടതിന് പിന്നാലെ ‘ഒറ്റക്കൊമ്പൻ’ സിനിമ താൽക്കാലികമായി നിർത്തിവെച്ചുവെന്ന വാർത്തകളും മാധ്യമങ്ങളിൽ നിറയുകയാണ്. എന്നാൽ ഇത്തരം അഭ്യൂഹങ്ങളെ തള്ളി സുരേഷ് ഗോപി എത്തി. പ്രോജക്‌ട് ഓൺ ആണെന്നും ചിത്രം അടുത്ത വർഷം തിയേറ്ററുകളിലെത്തുമെന്നുമാണ് സുരേഷ് ഗോപി പറയുന്നത്.
സിനിമയുടെ പുതിയ പോസ്റ്റർ പങ്കുവെച്ചായിരുന്നു താരത്തിന്റെ പ്രതികരണം. സുരേഷ് ഗോപിയുടെ മുഖം കുറച്ച് മാത്രം വ്യക്തമാക്കുന്ന പോസ്റ്ററാണ് ആരാധകരുമായി താരം പങ്കിട്ടത്. ഊഹാപോഹങ്ങൾക്ക് ഇടമില്ല എന്ന അടിക്കുറിപ്പും സുരേഷ് ഗോപി പങ്കുവെച്ചു. ചിത്രം അടുത്ത വർഷം റിലീസ് ചെയ്യും എന്ന സൂചന നൽകി 2025 എന്നും പോസ്‌റ്റിൽ ചേർത്തിട്ടുണ്ട്. താരത്തിന്റെ കരിയറിലെ 250-ാം ചിത്രമാണ് ഒറ്റക്കൊമ്പൻ.
സുരേഷ് ഗോപിക്ക് അമിത് ഷാ അഭിനയത്തിന് തടയിട്ടതായാണ് റിപ്പോർട്ട്. വർഷത്തിൽ ഒരു സിനിമ എന്ന അമിത് ഷായുടെ നിർദേശം അംഗീകരിച്ച് സുരേഷ് ഗോപി. ആഴ്ച്ചയിൽ മൂന്ന് ദിവസം ഡൽഹിയിൽ ഉണ്ടാവണം, പേഴ്സണൽ സ്‌റ്റാഫിനെ നിയമിക്കണം തുടങ്ങിയ നിർദേശങ്ങളാണ് ബിജെപി കേന്ദ്ര നേതൃത്വം നൽകിയത്. അതേസമയം, ഒറ്റ കൊമ്പൻ എസ്ജി 250 എന്ന പേരിൽ ചിത്രീകരണം പൂർത്തിയാക്കും.
