നടനവിസ്മയം മോഹന്‍ലാലിന്റെ സംവിധാന മികവിൽ പുറത്തിറങ്ങുന്ന ചിത്രമാണ് ‘ബറോസ്’. ആരാധകർ വളരെ ആകാംക്ഷയോടെ കാത്തിരിക്കുന്ന ചിത്രത്തിന്റെ 3 ഡി ട്രെയ്ലർ റിലീസ് പ്രഖ്യാപിച്ചിരിക്കുകയാണ് താരം. ഇന്ന് വൈകുന്നേരം 5 മണിക്കാണ് ട്രെയ്ലർ റിലീസ്.
തന്റെ ഫെയ്‌സ്ബുക്ക് പേജിലൂടെ മോഹൻലാൽ തന്നെയാണ് ഇക്കാര്യം ആരാധകരെ അറിയിച്ചത്. ഇതോടെ ട്രെയ്ലർ കാണുന്നതിനായി മണിക്കൂറുകൾ എണ്ണി കാത്തിരിക്കുകയാണ് ആരാധകർ. ഡിഗാമയുടെ നിധി കാക്കുന്ന ബറോസ് എന്ന ഭൂതമായാണ് ചിത്രത്തിലെ ടൈറ്റിൽ കഥാപാത്രമായി മോഹൻലാൽ എത്തുന്നത്.
ഗുരുസോമസുന്ദരം, മോഹൻശർമ, തുഹിൻ മേനോൻ, മായാ, സീസർ ലോറൻ്റെ തുടങ്ങി വിദേശതാരങ്ങളുൾപ്പെടെ ചിത്രത്തിലെ മറ്റ് കഥാപാത്രങ്ങളെ അവതരിപ്പിക്കുന്നുണ്ട്. ആശിർവാദ് സിനിമാസിന്റെ ബാനറിൽ ആൻ്റണി പെരുമ്പാവൂരാണ് ബറോസ് നിർമ്മിക്കുന്നത്.
