മലയാളത്തിലെ എക്കാലത്തെയും മികച്ച ആക്ഷൻ ത്രില്ലറുകളിൽ ഒന്നായ മമ്മൂട്ടി ചിത്രം ‘വല്ലേട്ടൻ’ 4കെ മികവിൽ വീണ്ടും പ്രേക്ഷകരിലേയ്ക്ക് എത്തുകയാണ്. വെള്ളിയാഴ്‌ചയാണ് ചിത്രം റീ-റിലീസ് ചെയ്യുന്നത്. ഇതിനുമുന്നോടിയായി ഇപ്പോൾ മമ്മൂട്ടിയുടെ ഒരു വീഡിയോയാണ് സാമൂഹ്യമാധ്യമങ്ങളിൽ വൈറലാകുന്നത്.
മമ്മൂട്ടി തന്നെ നേരിട്ട് ചിത്രത്തെക്കുറിച്ച് സംസാരിക്കുന്നതാണ് വീഡിയോയിൽ. വല്യേട്ടൻ ഒരിക്കൽ കൂടി നിങ്ങളെ കാണാനെത്തുകയാണെന്നാണ് താരം പറയുന്നത്. ചിത്രത്തിന്റെ അണിയറ പ്രവർത്തകരാണ് വീഡിയോ പുറത്തുവിട്ടിരിക്കുന്നത്. വീഡിയോ ഇതിനോടകം ആരാധകർ ഏറ്റെടുക്കുകയും ചെയ്തു.
“വല്ലേട്ടൻ സിനിമ റിലീസായപ്പോൾ ഒരുപാട് പേർ തിയേറ്ററിലും ടിവിയിലുമൊക്കെ കണ്ടതാണ്. അതിനെക്കാൾ കൂടുതൽ ഭംഗിയോടുകൂടി, ശബ്ദദൃശ്യഭംഗിയോടുകൂടി വീണ്ടും വല്ലേട്ടൻ നിങ്ങളെ കാണാനെത്തുകയാണ്” എന്നാണ് മമ്മൂട്ടി വീഡിയോയിൽ പറയുന്നത്. മാറ്റിനി നൗവാണ് 4K ദൃശ്യമികവോടെയും ഡോൾബി ശബ്‌ദ സാങ്കേതികവിദ്യയോടെയും വെള്ളിത്തിരയിലേക്ക് തിരിച്ചെത്തിക്കുന്നത്.
രഞ്ജിത്തിൻ്റെ തിരക്കഥയിൽ ഷാജി കൈലാസ് ഒരുക്കിയ വല്യേട്ടൻ 2000 സെപ്റ്റംബർ പത്തിനാണ് റിലീസ് ചെയ്‌തത്. ആ വർഷത്തെ സൂപ്പർഹിറ്റ് ചിത്രങ്ങളിൽ ഒന്നായിരുന്നു ചിത്രം.
