മലയാളത്തിലെ നിരവധി ചിത്രങ്ങൾ അന്യഭാഷകളിലേക്ക് റീമേക്ക് ചെയ്യപ്പെട്ടുകൊണ്ടിരിക്കുകയാണ്. അതിന് പിന്നാലെ സൂപ്പർഹിറ്റ് ചിത്രമായ ബ്രോ ഡാഡിയും തെലുങ്കിലേക്ക് റീമേക്ക് ചെയ്യപ്പെടാൻ ഒരുങ്ങുകയാണ്. സിനിമയിൽ മോഹൻലാലിന്റെ വേഷത്തിലെത്തുക ചിരഞ്ജീവി ആയിരിക്കും. ലൂസിഫറിന് പിന്നാലെ പൃഥ്വിരാജ് സംവിധാനം ചെയ്ത രണ്ടാമത്തെ ചിത്രമാണ് തെലുങ്കിലേക്ക് റീമേക്ക് ചെയ്യുന്നത്.
സൊഡെ ചിന്നി നയന, ബംഗാരരാജു തുടങ്ങിയ ഹിറ്റ് ചിത്രങ്ങൾ സമ്മാനിച്ച കല്യാൺ കൃഷ്ണയാണ് തെലുങ്ക് റീമേക്ക് സംവിധാനം ചെയ്യുന്നത്. തൃഷയായിരിക്കും മലയാളത്തിൽ മീന അവതരിപ്പിച്ച കഥാപാത്രത്തിലെത്തുക. യുവതാരം സിദ്ധ ജൊന്നലഗദ്ദ പൃഥ്വിരാജിന്റെ റോളിലും ശ്രീലീല കല്യാണിയുടെ വേഷത്തിലും ചിത്രത്തിൽ അഭിനയിക്കും.
2022ലാണ് ബ്രോ ഡാഡി ഒടിടിയിലൂടെ റിലീസ് ചെയ്തത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂരാണ് ചിത്രം നിർമ്മിച്ചത്. എൻ ശ്രീജിത്തും ബിബിൻ ജോർജുമാണ് ചിത്രത്തിന്റെ തിരക്കഥ നിർവഹിച്ചത്. ചിത്രം പുറത്തിറങ്ങിയ ആദ്യദിവസം ഏറ്റവും കൂടുതൽ വരിക്കാരെ ഉണ്ടാക്കിയ ചിത്രമെന്ന റെക്കോർഡും റിലീസിന്റെ ആദ്യദിവസം ഏറ്റവും കൂടുതൽ പേർ കണ്ട രണ്ടാമത്തെ ചിത്രമെന്ന നേട്ടവും ബ്രോ ഡാഡി സ്വന്തമാക്കിയിരുന്നു. ചിത്രത്തിൽ പൃഥ്വിരാജിന്റെ അച്ഛനായിട്ടാണ് മോഹൻലാൽ എത്തിയത്. അമ്മ വേഷത്തിൽ മീനയുമെത്തി. ലാലു അലക്സ്, കനിഹ, കല്യാണി പ്രിയദർശൻ എന്നിവരാണ് മറ്റു കഥാപാത്രങ്ങളെ അവതരിപ്പിച്ചത്.
