ഉലക നായകൻ കമൽ ഹാസന് ഇന്ന് 70-ാം പിറന്നാൾ. ഇന്ത്യൻ സിനിമ കണ്ട എക്കാലത്തെയും മികച്ച നടന്മാരിലൊരാളായ കമൽഹാസൻ അഭിനേതാവായി മാത്രമല്ല എഴുത്തുകാരൻ, സംവിധായകൻ, നിർമ്മാതാവ്, നൃത്തസംവിധായകൻ, ഗാനരചയിതാവ്, നർത്തകൻ, ഗായകൻ എന്നീ നിലകളിലെല്ലാം മികവ് തെളിയിച്ച പ്രതിഭയാണ്.
പ്രേക്ഷകരെ വിസ്‌മയിപ്പിച്ച, അമ്പരപ്പിച്ച എത്രയെത്ര കഥാപാത്രങ്ങൾ.. ഗുണയും അവ്വ ഷൺമുഖിയും ഇന്ത്യനും ദശാവതാരവും വിശ്വരൂപവും എല്ലാം മറ്റൊരാൾക്കും ചെയ്യാൻ സാധിക്കാത്ത വിധത്തിലാണ് കമൽ അനശ്വരമാക്കിയത്. ആറ് പതിറ്റാണ്ടിലേറെയായി സജീവമായി തുടരുന്ന ചലച്ചിത്രയാത്ര, അസാധാരണമായ നടനവൈഭവം, മികച്ച നർത്തകൻ, ആക്ഷൻരംഗങ്ങളിലെ കൃത്യത, അങ്ങനയങ്ങനെ കമൽഹാസനെ വേറിട്ടുനിർത്തുന്ന ഘടകങ്ങൾ ഒട്ടേറെയുണ്ട്.
1960-ൽ കളത്തൂർ കണ്ണമ്മ എന്ന ചിത്രത്തിലൂടെയാണ് വെള്ളിത്തിരയിലേക്കുള്ള അദ്ദേഹത്തിന്റെ വരവ്. ചിത്രത്തിലെ അഭിനയത്തിന് മികച്ച ബാലതാരത്തിനുള്ള രാഷ്ട്രപതിയുടെ സ്വർണ്ണ മെഡൽ സ്വന്തമാക്കുകയും ചെയ്തു. പിന്നീട് എംജിആർ, ശിവാജി ഗണേശൻ എന്നിവർക്കൊപ്പമെല്ലാം ബാലതാരമായി വേഷമിട്ടു. നടനെന്ന നിലയിൽ തമിഴിൽ ശ്രദ്ധേയനാകും മുൻപേ മലയാളത്തിൽ സൂപ്പർഹിറ്റുകൾ സ്വന്തമാക്കി. പട്ടാമ്പൂച്ചി എന്ന ചിത്രത്തിലൂടെയാണ് തമിഴിൽ താരപരിവേഷം നേടിയത്. അപൂർവരാഗങ്ങൾ അദ്ദേഹത്തിൻ്റെ എക്കാലത്തേയും വിജയകരമായ തമിഴ് ചിത്രമാണ്.
മികച്ച നടനുള്ള നാല് ദേശീയ പുരസ്കാരങ്ങൾ, 19 ഫിലിം ഫെയർ അവാർഡുകൾ, സിനിമയിലെ സംഭാവനകൾക്ക് കലൈമാമണി, പത്മശ്രീ, പദ്‌മഭൂഷൺ തുടങ്ങി എണ്ണമറ്റ പുരസ്കാരങ്ങൾ. 2016-ൽ ഫ്രഞ്ച് സർക്കാർ കമലിനെ പ്രശസ്‌തമായ ഷെവലിയർ ബഹുമതി നൽകി ആദരിച്ചു. അങ്ങനെ എണ്ണിയാലൊടുങ്ങാത്തതാണ് കമലിന്റെ നേട്ടങ്ങൾ.
