രാമായണത്തെ ആസ്പദമാക്കി ചിത്രീകരിച്ച ആദിപുരുഷ് സിനിമക്കെതിരെ രൂക്ഷവിമർശനം ഉയർത്തിയിരിക്കുകയാണ് നടൻ മുകേഷ് ഖന്ന. ചിത്രത്തിലൂടെ രാമായണത്തെ പരിഹസിക്കുകയാണെന്നും അതിനാൽ ആദിപുരുഷ് ടീമിനെ അമ്പത് ഡിഗ്രി സെൽഷ്യസിൽ നിർത്തി കത്തിക്കണമെന്നും മുകേഷ് ഖന്ന പറഞ്ഞു.
‘ചിത്രത്തിന്റെ അണിയറപ്രവർത്തകർ രാമായണം വായിച്ചിട്ടില്ലെന്ന് ഞാൻ പറയും. കാരണം രാവണന് എന്തു അനുഗ്രഹമാണ് കിട്ടിയതെന്ന് പോലും ഇവർക്ക് അറിയില്ല. ചെറിയ അറിവ് പോലുമില്ലാത്തവരാണ് വലിയ കാര്യങ്ങൾ സംസാരിക്കുന്നത്. സിനിമ തികച്ചും അസംബന്ധമാണ്. ഇതിനൊരിക്കലും മാപ്പ് തരില്ല’ മുകേഷ് ഖന്ന പറഞ്ഞു.
ചിത്രത്തിലെ സംഭാഷണങ്ങൾ ബാലിശമാണെന്നും താരം വിമർശിച്ചു. ഇത്രയും വിവാദങ്ങൾ നടക്കുമ്പോഴും സംവിധായകൻ ഓം റൗട്ടും തിരക്കഥാകൃത്ത് മനോജ് ശുക്ലയും മുഖം മറക്കാനായി മൗനം പാലിക്കുമെന്നാണ് വിചാരിച്ചത്. എന്നാൽ അവർ ചെയ്യുന്നതോ മുന്നോട്ടു വന്ന് ഇതിനെ വിശദീകരിക്കുന്നു. ഇത് സനാതന ധർമ്മത്തിന് വേണ്ടി ഒരുക്കിയ ചിത്രമാണെന്നാണ് അവർ പറയുന്നത്. എന്നാൽ ഞങ്ങളുടെ സനാതന ധർമ്മത്തിൽ നിന്ന് വ്യത്യസ്തമാണോ നിങ്ങളുടെത് എന്നും അദ്ദേഹം ചോദിച്ചു.
