മലയാള സിനിമാ പ്രേക്ഷകരെ ഏറെ ആവേശത്തിലാഴ്ത്തിയ ചിത്രമാണ് ബ്ലെസി സംവിധാനം ചെയ്‌ത ആടുജീവിതം. ബെന്യാമിന്റെ ആടുജീവിതം എന്ന നോവലിനെ അടിസ്ഥാനമാക്കിയാണ് ചിത്രമൊരുക്കിയിരിക്കുന്നത്. ഇപ്പോൾ 2024-ലെ ഹോളിവുഡ് മ്യൂസിക് ഇൻ മീഡിയാ പുരസ്കാരം സ്വന്തമാക്കിയിരിക്കുകയാണ് എ.ആർ.റഹ്മാനും ആടുജീവിതവും.
എ.ആർ.റഹ്മാൻ സംഗീതം നൽകിയ ‘പെരിയോനേ…’ എന്ന ഗാനമാണ് പുരസ്കാരത്തിന് അർഹത നേടിയത്. വിദേശ ഭാഷയിലെ സ്വതന്ത്ര സിനിമകളിലെ മികച്ച പശ്ചാത്തലസംഗീത വിഭാഗത്തിലാണ് ആടുജീവിതം സ്വപ്‌നതുല്യമായ നേട്ടം കൈവരിച്ചത്. ലോസ് ആഞ്ജലിസിൽ നടന്ന ചടങ്ങിൽ എ.ആർ. റഹ്മാനുവേണ്ടി സംവിധായകൻ ബ്ലെസി പുരസ്കാരം ഏറ്റുവാങ്ങി. ഓസ്ക‌റിന് മുന്നോടിയായി വിതരണം ചെയ്യുന്ന പുരസ്‌കാരമായാണ് ഹോളിവുഡ് മ്യൂസിക് ഇൻ മീഡിയാ അവാർഡ് വിശേഷിപ്പിക്കപ്പെടുന്നത്.
ഇതാദ്യമായാണ് ഒരു മലയാള ചിത്രം ഈ പുരസ്കാരം നേടുന്നത്. റഫീഖ് അഹമ്മദാണ് പെരിയോനെ എന്ന ഗാനത്തിന്റെ വരികളെഴുതിയത്. ജിതിൻരാജാണ് ഗാനം ആലപിച്ചത്. ഫീച്ചർ ഫിലിം ഗാനവിഭാഗത്തിലായിരുന്നു പെരിയോനേ മത്സരിച്ചത്. “ഈ വലിയ അംഗീകാരത്തിന് നന്ദി. എആർ റഹ്മാന് വേണ്ടിയാണ് ഞാനിവിടെ നിൽക്കുന്നത്. ഒരിക്കൽക്കൂടി എല്ലാവർക്കും നന്ദി” എന്നാണ് പുരസ്കാരം സ്വീകരിച്ചുകൊണ്ട് സംവിധായകൻ ബ്ലെസി പറഞ്ഞത്.
