സാമൂഹ്യ മാധ്യമങ്ങളിൽ വളരെയധികം ട്രെന്റിങ്ങായി മുന്നേറുന്നതാണ് സിനിമാ താരങ്ങളുടെ കമന്റ് ആവശ്യപ്പെട്ടുകൊണ്ടുള്ള വീഡിയോകൾ. തങ്ങളുടെ പ്രിയപ്പെട്ട താരങ്ങൾ കമന്റ് ചെയ്താൽ മാത്രമേ പഠിക്കൂ, കഴിക്കൂ എന്ന വിധത്തിൽ പ്രത്യക്ഷപ്പെടുന്ന വീഡിയോകൾക്ക് പല താരങ്ങളും മറുപടിയും നൽകാറുണ്ട്. ഇപ്പോൾ ഇത്തരത്തിൽ സൂപ്പർ സ്റ്റാർ മോഹൻലാലിന്റെ മറുപടി ആവശ്യപ്പെട്ടുകൊണ്ടുള്ള വീ‍ഡിയോയാണ് തരംഗമായിരിക്കുന്നത്.
“ലാലേട്ടൻ കമന്റ് ചെയ്താലേ ഞങ്ങൾ ഈ ബിസ്കറ്റ് കഴിക്കൂ” എന്ന റീലാണ് കഴിഞ്ഞ ദിവസം ഇൻസ്റ്റഗ്രാമിൽ പ്രത്യക്ഷപ്പെട്ടത്. ആരോമൽ എന്ന യുവാവാണ് വീഡിയോ പങ്കുവെച്ചിരിക്കുന്നത്. സംഭവം വൈറലായതോടെ ഇത് സാക്ഷാൽ മോഹൻലാലിന്റെ ശ്രദ്ധയിലുംപെട്ടു. ഉടൻതന്നെ അതിന് കമന്റുമായി താരമെത്തുകയും ചെയ്തു. “കഴിക്ക് മോനേ.. ഫ്രണ്ട്‌സിനും കൊടുക്കു” എന്നാണ് മോഹൻലാൽ കമന്റ് ചെയ്തത്. ഇതോടെ പലരും ഫെയ്ക് ഐഡിയിൽ നിന്നാണ് കമന്റ് വന്നതെന്ന വിധത്തിൽ പ്രതികരിക്കാൻ തുടങ്ങി. എന്നാൽ ഐഡി പരിശോധിച്ചതിൽ നിന്ന് യഥാർത്ഥ മോഹൻലാൽ ആണെന്ന് തിരിച്ചറിഞ്ഞതോടെ നിരവധിപേരാണ് താരത്തിന് സ്നേഹാന്വേഷണവുമായി എത്തുന്നത്.
ഇത്തരത്തിൽ മഞ്ഞുമ്മൽ ബോയ്സ് ടീമിന്റെയും ടൊവിനോ തോമസിന്റെയും വിജയ് ദേവരകൊണ്ടയുടെയുമെല്ലാം കമന്റ് അഭ്യർത്ഥിച്ച് നിരവധി പേരാണ് വീഡിയോ പങ്കുവെയ്ക്കുന്നത്. ഇവയ്ക്ക് പല താരങ്ങളും കമന്റും നൽകുന്നുണ്ട്. ഇതോടെ ഇത്തരം വീഡിയോകൾ സാമൂഹ്യമാധ്യമങ്ങളിൽ ട്രെന്റിങ് ആയിക്കൊണ്ടിരിക്കുകയാണ്.
