തമിഴ് സൂപ്പർതാരം അജിത് മോഹൻലാലിനൊപ്പം നിൽക്കുന്ന ചിത്രം പങ്കുവെച്ച് സമീർ ഹംസ. ദുബായ് ബുർജ് ഖലീഫയിലെ മോഹൻലാലിന്റെ ഫ്ലാറ്റിലായിരുന്നു അജിത്തിന്റെ സ്വകാര്യ സന്ദർശനം.
നിരവധിപ്പേരാണ് ചിത്രത്തിന് കമന്റുകളുമായി എത്തുന്നത്. ഈ കോംബോയിൽ ഒരു സിനിമ വരണമെന്നും ഇന്ത്യയിലെ സകല ബോക്സ്ഓഫിസ് റെക്കോർഡും ആ സിനിമ തകർത്തെറിയുമെന്നും ഇരുവരെയും ആരാധകർ അഭിപ്രായപ്പെടുന്നു. ചിത്രം ഇൻസ്റ്റഗ്രാമിൽ പങ്കുവെച്ചതിന് പിന്നാലെ നിരവധി സിനിമ പേജുകളിൽ വൈറലായി മാറിയിരിക്കുകയാണ് ചിത്രം.
തുനിവ് ആണ് അജിത്തിൻറേതായി അവസാനം തിയറ്ററുകളിലെത്തിയ ചിത്രം. മഗിഴ് തിരുമേനി സംവിധാനം ചെയ്യുന്ന ‘വിടാ മുയർച്ചി’യാണ് അദ്ദേഹത്തിൻറെ അടുത്ത ചിത്രം. മോഹൻലാലിൻറേതായി ഗംഭീര പ്രോജക്ടുകളാണ് അണിയറയിൽ ഒരുങ്ങുന്നത്. അദ്ദേഹത്തിൻറെ സംവിധാന അരങ്ങേറ്റചിത്രം ബറോസ്, ലിജോ ജോസ് പെല്ലിശ്ശേരിയുടെ മലൈക്കോട്ടൈ വാലിബൻ, ജീത്തു ജോസഫ് സംവിധാനം ചെയ്യുന്ന നേര്, പാൻ ഇന്ത്യൻ ചിത്രം വൃഷഭ, ജീത്തു ജോസഫിൻറെ തന്നെ റാം, പൃഥ്വിരാജ് സുകുമാരൻറെ എമ്പുരാൻ എന്നിങ്ങനെയാണ് മോഹൻലാലിൻറെ ലൈനപ്പുകൾ.
