‘വെറുമൊരു സുഹൃത്ത് മാത്രമായിരുന്നില്ല സംഗീത്, സഹോദരൻ കൂടിയായിരുന്നു. വിട സഹോദരാ…’ പ്രിയപ്പെട്ട സുഹൃത്തും സഹോദരനുമായ സംഗീത് ശിവന്റെ നിര്യണത്തിൽ അനുശോചനം രേഖപ്പെടുത്തിക്കൊണ്ട് മോഹൻലാൽ ഫേസ്ബുക്കിൽ പങ്കുവച്ച കുറിപ്പാണിത്. സംവിധാനത്തിലും ഛായാഗ്രഹണത്തിലും തൻ്റേതായ വ്യക്തിമുദ്ര പതിപ്പിച്ചയാളാണ് സംഗീത് ശിവൻ. ‘പ്രിയപ്പെട്ട സംഗീത് ശിവൻ, എനിക്ക് സുഹൃത്തിനേക്കാളുപരി സ്നേഹസമ്പന്നനായ ഒരു സഹോദരൻ കൂടിയായിരുന്നു നിങ്ങൾ. യോദ്ധയും, ഗാന്ധർവവും, നിർണ്ണയവും ഒക്കെ ഓരോ മലയാളിയുടെയും മനസിൽ ആഴത്തിൽ പതിഞ്ഞതിന് കാരണം അവയുടെയെല്ലാം പിന്നിൽ അദ്ദേഹത്തിൻ്റെ പ്രതിഭാസ്പർശം ഉള്ളതുകൊണ്ടാണ് – മോഹൻലാൽ കുറിച്ചു.
‘കാലമെത്ര കഴിഞ്ഞാലും സംഗീത് എന്ന മഹാപ്രതിഭയെ കലാകേരളം എന്നും ആദരവോടെ ഓർക്കും. അദ്ദേഹം സൃഷ്ടിച്ച കഥാപാത്രങ്ങൾ അനശ്വരരായി നിലകൊള്ളുകയും ചെയ്യും. പ്രിയ സഹോദരന് വേദനയോടെ വിട എന്ന് പറഞ്ഞുകൊണ്ടാണ് മോഹൻലാൽ കുറിപ്പ് അവസാനിപ്പിക്കുന്നത്.
സംഗീത് ശിവൻ സംവിധാനം ചെയ്ത ഹിറ്റ് ചിത്രങ്ങളിലെല്ലാം മോഹൻലാൽ ആയിരുന്നു നായക കഥാപാത്രത്തെ അവതരിപ്പിച്ചത്. യോദ്ധാ, ഗാന്ധർവം, നിർണയം എന്നിവയായിരുന്നു ആ ഹിറ്റ് ചിത്രങ്ങൾ. ഇതിൽ യോദ്ധാ എന്ന ചിത്രത്തിന് ഇന്നും ആരാധകർ ഏറെയാണ്. മലയാളത്തിലെ എവർഗ്രീൻ ക്ലാസിക് ചിത്രമായാണ് യോദ്ധ വിശേഷിപ്പിക്കപ്പെടുന്നത്. ഇനി യോദ്ധ പോലൊരു ചിത്രം പിറക്കുമോ? അതുല്യ കലാകാരന് ആദരാജ്ഞലികൾ.
