അർജൻ്റീനയുടെ സൂപ്പർ താരം ലയണൽ മെസി യുഎസ് മേജർ ലീഗ് സോക്കർ ലീഗ് ക്ലബ് ഇൻ്റർ മയാമിയിലേക്ക് പോകുന്നതായി റിപ്പോർട്ടുകൾ. ഇംഗ്ലണ്ടിൻ്റെ മുൻ സൂപ്പർ താരം ഡേവിഡ് ബെക്കാമിൻ്റെ ഉടമസ്ഥതയിലുള്ള ഇൻ്റർ മയാമി മെസിക്ക് വലിയ ഓഫർ നൽകിയതായി രാജ്യാന്തര മാധ്യമങ്ങൾ റിപ്പോർട്ട് ചെയ്യുന്നു. അടുത്ത സീസണിൽ മെസി ഫ്രഞ്ച് ക്ലബ് പാരിസ് സെൻ്റ് ജർമനിൽ നിന്ന് ഇൻ്റർ മയാമിയിലെത്തുമെന്നാണ് വിവരം. അങ്ങനെയെങ്കിൽ മേജർ ലീഗ് സോക്കർ ചരിത്രത്തിൽ തന്നെ ഏറ്റവും കൂടുതൽ പ്രതിഫലം വാങ്ങുന്ന താരമാകും മെസി.
നിലവിൽ സ്വിറ്റ്സർൻഡ് താരം സർദാൻ ഷക്കീരിയാണ് മേജർ ലീഗ് സോക്കറിൽ ഏറ്റവുമധികം പ്രതിഫലം വാങ്ങുന്നത്. ഷിക്കാഗോ ഫയറിനായി കളിക്കുന്ന താരത്തിന് പ്രതിവർഷം 8.15 മില്ല്യൺ ഡോളറാണ് പ്രതിഫലം. മെസി ഇൻ്റർ മയാമിയിലെത്തിയാൽ ഈ റെക്കോർഡാണ് തകരുക. മെസിക്കൊപ്പം ബാഴ്സ സഹതാരങ്ങളായ സെസ്ക് ഫാബ്രിഗാസ്, ലൂയിസ് സുവാരസ് എന്നിവരെയും ഇൻ്റർ മയാമി നോട്ടമിട്ടിട്ടുണ്ട്.
