തിയേറ്ററിൽ വീണ്ടും ഹിറ്റടിച്ച് മമ്മൂട്ടി. മാസ് ആക്ഷൻ ഹീറോയായി മമ്മൂട്ടിയെത്തിയ ‘ടർബോ’ തിയേറ്ററിൽ തരംഗമാകുകയാണ്. രാവിലെ 9 മണിയുടെ ആദ്യ ഷോ കഴിഞ്ഞപ്പോൾ മുതൽ ചിത്രത്തിന് മികച്ച പ്രേക്ഷക പ്രതികരണമാണ് ലഭിച്ചുകൊണ്ടിരിക്കുന്നത്.
ആക്ഷന് പുറമെ കോമഡിക്കും പ്രാധാന്യം നൽകുന്ന ടർബോ കളക്ഷൻ റെക്കോർഡുകൾ തിരുത്തിക്കുറിക്കുമെന്നാണ് സിനിമാ ലോകം വിലയിരുത്തുന്നത്. 2 മണിക്കൂർ 35 മിനിറ്റാണ് ചിത്രത്തിൻ്റെ ദൈർഘ്യം. എന്നാൽ സമയം പോകുന്നത് അറിയുന്നേയില്ലെന്നും മുഴുവൻ സമയ എന്റർടെയ്ൻമെന്റാണ് ചിത്രം സമ്മാനിക്കുന്നതെന്നുമാണ് പ്രേക്ഷകരുടെ അഭിപ്രായം.
കോടികൾ വാരിയെറിഞ്ഞ ഏഴ് ഫൈറ്റ് സീനുകളാണ് സിനിമയുടെ പ്രധാന കരുത്ത്. മമ്മൂട്ടി കമ്പനിയുടെ ബാനറിൽ നിർമ്മിക്കുന്ന അഞ്ചാമത്തെ സിനിമയാണ് ടർബോ. ജീപ്പ് ഡ്രൈവറായ ജോസിൻ്റെ കഥയാണ് ചിത്രം പറയുന്നത്. ജോസ് എന്ന കഥാപാത്രമായ് മമ്മൂട്ടി എത്തുന്ന ചിത്രത്തിലെ മറ്റ് സുപ്രധാന വേഷങ്ങൾ കന്നഡ താരം രാജ് ബി ഷെട്ടിയും തെലുങ്ക് നടൻ സുനിലുമാണ് അവതരിപ്പിക്കുന്നത്. ആക്ഷൻ രംഗങ്ങൾക്ക് ഏറെ പ്രാധാന്യം നൽകിയാണ് ചിത്രം ഒരുക്കിയിരിക്കുന്നത്.
