പക്കാ മാസ്സ് ആക്ഷൻ കോമഡി മൂവി, അതാണ് മമ്മൂട്ടിയുടെ ടർബോ. ചിത്രം പ്രഖ്യാപിച്ചത് മുതൽ ചിത്രീകരണം അവസാനിച്ചത് വരെ ആരാധകർ ഏറെ ആകാംഷയോടെ കാത്തിരിക്കുന്ന മമ്മൂട്ടി ചിത്രം. ഇപ്പോഴിതാ തിയ്യറ്ററുകൾ ഇളക്കി മറിക്കാൻ ടർബോ ജോസ് നേരത്തേ എത്തും എന്ന വിവരം പുറത്ത് വിട്ടിരിക്കുകയാണ് അണിയറ പ്രവർത്തകർ. ലോകമെമ്പാടുമുള്ള തിയേറ്ററുകളിൽ മെയ് 23 മുതൽ ‘ടർബോ’ പ്രദർശനത്തിനെത്തും. വിഷു ദിനത്തിൽ ജൂൺ 13ന് ചിത്രം റിലീസ് ചെയ്യും എന്നായിരുന്നു പ്രഖ്യാപിച്ചിരുന്നത്. എന്നാലിപ്പോൾ പ്രേക്ഷകർക്ക് സർപ്രൈസ് എൻട്രി നൽകി ‘ടർബോ ജോസ്’ ഒരൽപം നേരത്തെ എത്തുകയാണ്.
മെയ് 23 വേൾഡ് വൈഡ് റിലീസിനെത്തുന്ന ചിത്രത്തിന്റെ ഡിസ്ട്രിബ്യൂഷൻ വേഫറർ ഫിലിംസും ഓവർസീസ് ഡിസ്ട്രിബ്യൂഷൻ ട്രൂത്ത് ഗ്ലോബൽ ഫിലിംസുമാണ്. മമ്മൂട്ടി കമ്പനിയുടെ ബാനറിൽ വമ്പൻ ബജറ്റിൽ നിർമ്മിക്കുന്ന ടർബോ വൈശാഖാണ് സംവിധാനം ചെയ്യുന്നത്. മിഥുൻ മാനുവൽ തോമസിന്റെ തിരക്കഥയിൽ ടർബോ ജോസായി മമ്മൂട്ടിയുടെ പ്രകടനം കാണാൻ ആകാംഷയോടെ കാത്തിരിക്കുകയാണ് ആരാധകർ.
വൈശാഖും മമ്മൂട്ടിയും ഒന്നിച്ച ‘പോക്കിരിരാജ’, ‘മധുരരാജ’ എന്നീ ചിത്രങ്ങൾക്ക് ശേഷം ഈ കൂട്ടുകെട്ടിൽ എത്തുന്ന മൂന്നാമത്തെ സിനിമയാണ് ‘ടർബോ’. കന്നഡ താരം രാജ് ബി ഷെട്ടിയും തെലുങ്ക് നടൻ സുനിലും സുപ്രധാന വേഷങ്ങളിലെത്തുന്നുണ്ട്. ഫസ്റ്റ്ലുക്ക് പോസ്റ്റർ അടക്കം ചിത്രത്തിന്റെതായി പുറത്തുവന്ന പോസ്റ്ററുകൾക്കെല്ലാം വലിയ സ്വീകാര്യതയാണ് പ്രേക്ഷകരിൽ നിന്നും ലഭിക്കുന്നത്. ആക്ഷൻ രംഗങ്ങൾക്ക് ഏറെ പ്രാധാന്യം നൽകി ഒരുങ്ങുന്ന ഈ ചിത്രത്തിലെ ആക്ഷൻ രംഗങ്ങൾ വിയറ്റ്നാം ഫൈറ്റേർസാണ് കൈകാര്യം ചെയ്യുന്നത്. പശ്ചാത്തല സംഗീതം ക്രിസ്റ്റോ സേവ്യറും ടീമും നിർവഹിക്കുന്നു. മാസ്സ് ആക്ഷൻ കോമഡി കലർന്ന ബിജിഎമ്മുകളിൽ ടർബോ ജോസിന്റെ എൻട്രി ആഘോഷിക്കാൻ തിയ്യറ്ററുകളും ആരാധകരും ഒരുങ്ങിക്കഴിഞ്ഞു.
