ദിവസങ്ങൾ നീണ്ട വിവാഹ ആഘോഷങ്ങളോടും തിരക്കുകളോടും ബൈ പറഞ്ഞ് മാളവിക ജയറാം. വിവാഹം റജിസ്റ്റർ ചെയ്ത സർട്ടിഫിക്കറ്റ് കയ്യിൽ പിടിച്ച് നവനീതിനെ ചുംബിക്കുന്ന ചിത്രം ഇൻസ്റ്റഗ്രാമിൽ പങ്കിട്ടാണ് മാളവിക ആഘോഷങ്ങളോട് വിട പറഞ്ഞത്. ‘അങ്ങനെ അതിന് അവസാനം’ എന്ന അടിക്കുറിപ്പോടെയാണ് താരപുത്രി ചിത്രം പങ്കിട്ടത്.
കഴിഞ്ഞ ദിവസം ഗുരുവായൂരിൽ വെച്ചാണ് പാലക്കാട് നെന്മാറ സ്വദേശിയായ നവനീത് മാളവികയുടെ കഴുത്തിൽ താലി ചാർത്തിയത്. തുടർന്ന് താരനിബിഢമായ വിവാഹ റിസപ്ഷനുകളും സംഘടിപ്പിക്കപ്പെട്ടിരുന്നു. അതിഥികൾക്കായി മൂന്ന് സ്വീകരണ ചടങ്ങുകളാണ് സംഘടിപ്പിച്ചിരുന്നത്. താലികെട്ടിന് ശേഷം തൃശൂരിലെ നക്ഷത്ര ഹോട്ടലിൽ മുഖ്യമന്ത്രി ഉൾപ്പടെയുള്ള പ്രമുഖർക്ക് വിരുന്നൊരുക്കി. പിന്നാലെ കൊച്ചിയിൽ സിനിമാക്കാർക്കായി ഗ്രാൻഡ് റിസപ്ഷനും അതിനുശേഷം നവനീതിന്റെ നാടായ പാലക്കാട് വെച്ച് വരൻ്റെ വീട്ടുകാർ പ്ലാൻ ചെയ്ത റിസപ്ഷനും നടന്നിരുന്നു.
റിസപ്ഷനുകളിൽ വിവിധ ലുക്കിലാണ് മാളവികയും നവനീതും കുടുംബവും തിളങ്ങിയത്. മലയാളത്തിലെ പ്രമുഖ താരങ്ങളായ മമ്മൂട്ടി, മോഹൻലാൽ, സുരേഷ് ഗോപി, ദിലീപ്, പൃഥ്വിരാജ്, ശോഭന, കാവ്യ തുടങ്ങി ഒട്ടുമിക്ക താരങ്ങളും തമിഴ് സിനിമാ ലോകത്ത് നിന്ന് ഖുശ്‌ബു, പൂർണിമ, സുഹാസിനി എന്നിവരും വിവാഹത്തിൽ പങ്കെടുത്തിരുന്നു.
