തിയേറ്ററുകളെ പ്രകമ്പനം കൊള്ളിച്ച് തുടർച്ചയായി വിജയങ്ങൾ ഏറ്റുവാങ്ങുകയാണ് സൂപ്പർ സ്റ്റാർ മമ്മൂട്ടിയുടെ ചിത്രങ്ങൾ. പ്രേക്ഷകരുടെ വിലമതിക്കാനാകാത്ത അഭിപ്രായങ്ങൾക്ക് വിജയാഘോഷത്തിന്റെ ഭാഗമായി ഒരു പുരസ്കാരം കൂടി ഇപ്പോൾ താരത്തെ തേടിയെത്തിയിരിക്കുകയാണ്. പുരസ്കാരത്തേക്കാൾ അത് നൽകിയ മൂന്ന് പേരാണ് ഇപ്പോൾ സാമൂഹ്യ മാധ്യമങ്ങളിലെ ചർച്ചാ വിഷയം.
കണ്ണൂർ സ്ക്വാഡിന്റെയും കാതൽ ദ് കോറിന്റെയും വിജയാഘോഷ വീഡിയോയാണ് ഇപ്പോൾ വൈറലായിരിക്കുന്നത്. മമ്മൂട്ടിയെ സംബന്ധിച്ചിടത്തോളം കുടുംബത്തിൻ്റെ ഒത്തുചേരൽ കൂടിയായിരുന്നു പരിപാടി. വിജയനായകനുള്ള പുരസ്കാരം താരത്തിന്റെ കുടുംബാംഗങ്ങളിൽ നിന്ന് തന്നെയാണ് മമ്മൂട്ടി ഏറ്റുവാങ്ങിയത്. കണ്ണൂർ സ്‌ക്വാഡിന് വേണ്ടി ഒരു പുരസ്കാരം ഭാര്യ സുൽഫത്ത് കൈമാറിയപ്പോൾ മറ്റൊരു പുരസ്കാരം മകൾ സുറുമിയും മരുമകൾ അമാലും ചേർന്നാണ് മമ്മൂട്ടിക്ക് സമ്മാനിച്ചത്.
തന്റെ സഹപ്രവർത്തകർക്കും വേദിയിൽ വെച്ച് മമ്മൂട്ടി പുരസ്കാരങ്ങൾ സമ്മാനിച്ചു. വെള്ള കുർ‍ത്തിയിൽ തിളങ്ങി നിന്ന മമ്മൂട്ടി കുടുംബാംഗങ്ങളോടും സഹതാരങ്ങളോടുമെല്ലാം തമാശകൾ പറഞ്ഞ് നിൽക്കുന്നത് വീഡിയോയിൽ കാണാം. താരത്തിന്റെ സിംപിൾ ലുക്ക് ഇതിനോടകം ചർച്ചയാകുകയും ചെയ്തിരുന്നു.
