തെന്നിന്ത്യൻ സിനിമാ പ്രേമികൾ ഏറെ ആകാംക്ഷയോടെ കാത്തിരിക്കുന്ന ചിത്രമാണ് സൂര്യ നായകനായെത്തുന്ന പുതിയ ചിത്രം ‘കങ്കുവാ’. സൂര്യയുടെ കരിയറിലെ തന്നെ ഏറ്റവും കൂടുതൽ മുതൽ മുടക്കുള്ള ചിത്രത്തിന്റെ പുതിയ പോസ്റ്റർ പുറത്ത് വീട്ടിരിക്കുകയാൻ അണിയറ പ്രവർത്തകർ. ശിവ സംവിധാനം ചെയ്യുന്ന ‘കങ്കുവാ’ പീരിയോഡിക് ത്രീഡി ചിത്രമായാണ് പ്രദർശനത്തിനെത്തുക.
കയ്യിൽ തീപന്തവുമായി നിൽക്കുന്ന സൂര്യയെയാണ് ദീപാവലി ദിനത്തിൽ പുറത്തുവന്ന പോസ്റ്ററിൽ കാണാനാവുക. നായകന്റെ ചുറ്റും പ്രത്യേകതരം വാദ്യങ്ങളുമായി നിൽക്കുന്നവരേയും കാണാം. പത്ത് ഭാഷകളിൽ റിലീസ് ചെയ്യുന്ന ചിത്രത്തിൽ ബോളിവുഡ് താരം ദിഷ പഠാണിയാണ് നായികയായി എത്തുന്നത്. ബോബി ഡിയോളാണ് വില്ലൻ വേഷത്തിൽ. സൂര്യയുടെ ഇതുവരെ കാണാത്ത വേഷപ്പകർച്ചയാണ് ചിത്രത്തിൽ കാണാൻ സാധിക്കുക. ‘കങ്കുവാ’ എന്ന ഗോത്രസമൂഹത്തേക്കുറിച്ചുള്ള കഥയാണ് ചിത്രമെന്നാണ് പുറത്തുവന്ന ദൃശ്യങ്ങളും പോസ്റ്ററുകളും നൽകുന്ന സൂചന.
