സൂര്യ ആരാധകർ ഏറെ ആകാംഷയോടെ കാത്തിരിക്കുന്ന ചിത്രമാണ് ശിവ സംവിധാനം ചെയ്യുന്ന ‘കങ്കുവ’. ഈ ബിഗ് ബജറ്റ് സിനിമയുടെ പ്രഖ്യാപനം മുതല്‍ വലിയ ആവേശത്തിലാണ് ആരാധകര്‍. സൂര്യയുടെ ഫസ്റ്റ് ലുക്ക്‌ പോസ്റ്ററും ഏറെ ചർച്ചചെയ്യപ്പെട്ടിരുന്നു. കുറച്ച് ദിവസങ്ങള്‍ക്ക് മുന്‍പാണ് ചിത്രത്തിന്റെ ടീസര്‍ പുറത്തിറങ്ങിയത്. പീരിയഡ് ഡ്രാമ വിഭാഗത്തിലുള്ള കങ്കുവയുടെ ടീസറിന് മികച്ച പ്രതികരണമാണ് ലഭിച്ചത്.
ചിത്രത്തിലെ പ്രധാന ആകർഷണമായ ഒരു യുദ്ധരംഗമാണ് ഇപ്പോൾ ചർച്ചയാവുന്നത്. സിജിഐ, ഗ്രാഫിക്‌സ് എന്നിവയുടെ പിന്തുണയില്ലാതെ തന്നെ യുദ്ധം ചിത്രീകരിക്കാന്‍ 10000 ആര്‍ട്ടിസ്റ്റുകളെ കളത്തിലിറക്കിയെന്നാണ് സിനിമയോടടുത്തുള്ള വൃത്തങ്ങള്‍ പുറത്തുവിടുന്നത്. സൂര്യ, ബോബി ഡിയോള്‍ എന്നിവര്‍ അഭിനയിക്കുന്ന ക്ലൈമാക്‌സിലാണ് ഈ യുദ്ധരംഗം. ഇതോടെ സിനിമയുടെ റിലീസിനായുള്ള കാത്തിരിപ്പിന് കൂടുതൽ ആവേശത്തിലാണ് ആരാധകർ.
1000 വര്‍ഷങ്ങള്‍ക്ക് മുമ്പുള്ള കാലഘട്ടത്തിലൂടെ സഞ്ചരിക്കുന്ന ‘കങ്കുവ’യില്‍ ഒരു യോദ്ധാവായാണ് സൂര്യയെ കാണാൻ കഴിയുക. ചിത്രത്തില്‍ സൂര്യയുടേത് ഇരട്ട കഥാപാത്രമായിരിക്കുമെന്നതാണ് മറ്റൊരു പ്രത്യേകത.മുപ്പത്തിയെട്ടോളം ഭാഷകളില്‍ റിലീസ് ചെയ്യുന്ന ചിത്രത്തില്‍ ബോളിവുഡ് താരം ദിഷ പഠാണിയാണ് നായികയായെത്തുന്നത്. വിവേകയും മദന്‍ കര്‍ക്കിയും ചേര്‍ന്നാണ് ചിത്രത്തിലെ ഗാനരചന നിർവഹിച്ചിരിക്കുന്നത്. സുപ്രീം സുന്ദറാണ് സംഘട്ടന സംവിധാനം. യു.വി. ക്രിയേഷന്‍സിന്റെ ബാനറില്‍ വംശി പ്രമോദും സ്റ്റുഡിയോ ഗ്രീനിന്റെ ബാനറില്‍ കെ.ഇ. ജ്ഞാനവേല്‍ രാജയും ചേര്‍ന്നാണ് ചിത്രം നിര്‍മ്മിക്കുന്നത്.
