ഹോളിവുഡ് താരങ്ങളായ ജെന്നിഫർ ലോപ്പസും ബെൻ അഫ്ളെക്കും പ്രണയം തകർന്ന് പതിനെട്ട് വർഷത്തിന് ശേഷം വിവാഹിതരായി. ലാസ് വെഗാസിലാണ് ഇരുവരും വിവാഹിതരായത്. ആദ്യം പ്രണയം തകർന്ന് 18 വർഷത്തിന് ശേഷമാണ് ഇരുവരും കഴിഞ്ഞ ദിവസം വിവാഹിതരാകുന്നത്. 22 വർഷങ്ങൾക്ക് മുൻപ് ജെന്നിഫർ ലോപ്പസും ബെൻ അഫ്ളെക്കും വിവാഹിതരാകാൻ തീരുമാനിക്കുകയും ഔദ്യോഗികമായി വിവാഹനിശ്ചയം നടത്തുകയും ചെയ്തെങ്കിലും രണ്ടു വർഷങ്ങൾക്ക് ശേഷം വേർപിരിയുകയായിരുന്നു.
തങ്ങളുടെ വിവാഹ നിശ്ചയം വീണ്ടും നടന്നതായി ജെന്നിഫർ നേരത്തെ ഇൻസ്റ്റാഗ്രാമിലൂടെ അറിയിച്ചിരുന്നു. 2002ൽ പുറത്തിറങ്ങിയ ഗിഗ്ലി എന്ന ചിത്രത്തിലൂടെയാണ് ജെന്നിഫർ ലോപ്പസും ബെൻ അഫ്ളെക്കും ആദ്യമായി കണ്ടുമുട്ടുന്നത്.
2003ൽ ഇവർ വിവാഹതരാകുന്നുവെന്ന വാർത്തകൾ ഉണ്ടായിരുന്നെങ്കിലും 2004ൽ വേർപിരിയുകയായിരുന്നു. 2004 ജൂണിൽ ജെന്നിഫർ ഗായകൻ മാർക്ക് ആന്റണിയെ വിവാഹം കഴിച്ചു. 2008ൽ അവർക്ക് മാക്സ്, എമ്മ എന്നീ ഇരട്ടക്കുട്ടികൾ ജനിച്ചത് വാർത്തകളിൽ ഇടംപിടിച്ചു.
2005ൽ ബെൻ അഫ്ലക്ക് നടി ജെന്നിഫർ ഗാർണറെ വിവാഹം കഴിച്ചെങ്കിലും 2017ൽ വിവാഹമോചിതരായി. 2021 മെയിൽ ജെന്നിഫർ ലോപ്പസും ബെൻ അഫ്ളെക്കും വീണ്ടും ഒന്നിക്കുകയായിരുന്നു. ഇരുവരും ഒന്നിച്ചുള്ള നിരവധി ചിത്രങ്ങളും പുറത്ത് വന്നിരുന്നു. നെവാഡയിൽ വച്ച് വിവാഹ ലൈസൻസ് നേടി ഇവർ വിവാഹിതരാകാൻ തീരുമാനിച്ചതോടെ 2022 ഏപ്രിലിൽ ഇരുവരുടേയും വിവാഹ നിശ്ചയവും നടന്നിരുന്നു.
