സംവിധായകന്‍ മിഥുന്‍ മാനുവല്‍ തോമസും ജയറാമും ആദ്യമായി ഒന്നിക്കുന്ന ‘ഏബ്രഹാം ഓസ്ലർ’ ജനുവരി 11ന് റിലീസ് ചെയ്യും. ‘അഞ്ചാം പാതിരാ’ എന്ന സൂപ്പര്‍ഹിറ്റ് ചിത്രത്തിനു ശേഷം മിഥുന്‍ സംവിധാനം ചെയ്യുന്ന ചിത്രമാണിത്. അഞ്ചാം പാതിരാ പോലെ തന്നെ ക്രൈം ത്രില്ലര്‍ വിഭാഗത്തില്‍ പെടുന്ന ചിത്രമാണ് ഏബ്രഹാം ഓസ്ലർ. വലിയ ബജറ്റുള്ള മെഡിക്കൽ ത്രില്ലര്‍ ഗണത്തിൽപെടുന്ന ചിത്രമാണിത്. ഇര്‍ഷാദ് എം. ഹസ്സനൊപ്പം മിഥുന്‍ മാനുവല്‍ തോമസും ചേര്‍ന്നാണ് ചിത്രത്തിന്റെ നിര്‍മാണം നിർവഹിക്കുന്നത്.
മമ്മൂട്ടി അഥിതി വേഷത്തിൽ എത്തുന്നു എന്നതാണ് ചിത്രത്തിന്റെ മറ്റൊരു പ്രത്യേകത. സിനിമയുടെ രണ്ടാം പകുതിയിൽ 30 മുതൽ 40 മിനിറ്റോളം നീണ്ടു നിൽക്കുന്ന സ്ക്രീന്‍ ടൈം ഉള്ള കഥാപാത്രമാണ് മമ്മൂട്ടി ചെയ്യുന്നത്. എന്നാൽ ഒരു അതിഥി വേഷത്തിൽ ഒതുങ്ങാതെ വളരെ ശക്തമായ കഥാപാത്രമായാകും മമ്മൂട്ടി എത്തുക എന്നും സൂചനയുണ്ട്.
ഡോ. രണ്‍ധീര്‍ കൃഷ്ണന്‍ ആണ് ചിത്രത്തിന്റെ രചന. ഛായാഗ്രഹണം തേനി ഈശ്വര്‍ നിർവഹിക്കുന്നു. സംഗീതം മിഥുന്‍ മുകുന്ദന്‍. എഡിറ്റിംഗ് സൈജു ശ്രീധരനനും കലാസംവിധാനം ഗോകുല്‍ ദാസും നിർവഹിക്കുന്നു. എക്സിക്യൂട്ടീവ് പ്രൊഡ്യൂസര്‍ ജോണ്‍ മന്ത്രിക്കലാണ്. ലൈന്‍ പ്രൊഡ്യൂസര്‍ സുനില്‍ സിംഗ്. ക്രിയേറ്റീവ് ഡയറക്ടര്‍ പ്രിന്‍സ് ജോയാണ്. പ്രൊഡക്ഷന്‍ കണ്‍ട്രോളര്‍ പ്രശാന്ത് നാരായണന്‍. മേക്കപ്പ് റോണക്സ് സേവ്യര്‍ നിർവഹിക്കുന്നു. സ്റ്റില്‍സ് എസ്.ബി.കെ ഷുഹൈറും ഡിസൈന്‍സ് യെല്ലോ‍ടൂത്ത്സുമാണ് കൈകാര്യം ചെയ്യുന്നത്.
