ചരിത്രം കുറിച്ച് ഇന്ത്യൻ ക്രിക്കറ്റ് താരം ജസ്പ്രീത് ബുംറ. ഐ.സി.സിയുടെ ടെസ്റ്റ് ബൗളർമാരുടെ റാങ്കിങ്ങിൽ ഒന്നാം സ്ഥാനം നേടിയിരിക്കുകയാണ് ഇന്ത്യയുടെ ഈ സ്റ്റാർ പേസർ. ടെസ്റ്റ് റാങ്കിങ്ങിൽ ഒന്നാമത് എത്തുന്ന ഇന്ത്യയുടെ ആദ്യ പേസ് ബൗളറെന്ന ബഹുമതിയും ബുംറയ്ക്ക് സ്വന്തം. രവിചന്ദ്ര അശ്വിൻ, രവീന്ദ്ര ജഡേജ, ബിഷൻ ബേദി എന്നിവരാണ് ടെസ്റ്റിൽ ഒന്നാം സ്ഥാനത്തെത്തിയ മറ്റ് ഇന്ത്യൻ ബൗളർമാർ. എന്നാൽ ഐ.സി.സിയുടെ ടെസ്റ്റ്, ഏകദിനം, ട്വന്റി 20 ഫോർമാറ്റ് എന്നിവയിൽ ഒന്നാമത് എത്തിയ ആദ്യ ഇന്ത്യൻ ബൗളർ എന്ന നേട്ടവും ബുംറ സ്വന്തമാക്കി.
ഇംഗ്ലണ്ടിനെതിരായ ടെസ്റ്റ് പരമ്പരയിലെ മികച്ച പ്രകടനമാണ് ബുംറയെ ഒന്നാം സ്ഥാനത്തേക്കെത്തിച്ചത്. ഹൈദരാബാദിൽ നടന്ന പരമ്പരയിലെ ആദ്യ ടെസ്റ്റിൽ ആറ് വിക്കറ്റ് വീഴ്ത്തിയ ബുംറ വിശാഖപ്പട്ടണത്ത് നടന്ന രണ്ടാം ടെസ്റ്റിൽ ഒമ്പത് വിക്കറ്റുകളും നേടിയിരുന്നു. മാത്രമല്ല, രണ്ടാം ടെസ്റ്റിൽ ഇന്ത്യയെ ജയത്തിലെത്തിച്ച ബുംറ തന്നെയായിരുന്ന കളിയിലെ മികച്ച താരവും.
ദക്ഷിണാഫ്രിക്കയുടെ 851റാങ്ക് നേടിയ കഗിസോ റബദയെയാണ് ബുംറ മറികടന്നത്. 881 ആണ് ജസ്പ്രീത് ബുംറയുടെ റേറ്റിംഗ്. നേരത്തെ ഒന്നാം സ്ഥാനത്തുണ്ടായിരുന്ന ഇന്ത്യൻ സ്പിന്നർ ആർ.അശ്വിൻ 841 റേറ്റിങ്ങുമായി മൂന്നാം സ്ഥാനത്താണുള്ളത്. ഒമ്പതാം സ്ഥാനത്തായി രവീന്ദ്ര ജഡേജയും പട്ടികയിലുണ്ട്.
