മലയാള സിനിമാ പ്രേമികളുടെ പ്രിയപ്പെട്ട താര സഹോദരങ്ങളാണ് ഇന്ദ്രജിത്തും പൃഥ്വിരാജും. ഇരുവരും ഒന്നിച്ചുള്ള നിരവധി ചിത്രങ്ങൾ പുറത്തിറങ്ങിയിട്ടുണ്ടെങ്കിലും പ്രേക്ഷകർ ആവേശത്തോടെ കാത്തിരിക്കുന്ന ചിത്രമാണ് പൃഥ്വിരാജിന്റെ സംവിധാന മികവിൽ ഒരുങ്ങുന്ന എമ്പുരാൻ. ചിത്രത്തിന്റെ ഷൂട്ടിങ്ങിനായി അമേരിക്കയിലെത്തിയ ഇന്ദ്രജിത്ത് സാമൂഹ്യമാധ്യമങ്ങളിൽ പങ്കുവെച്ച ചിത്രമാണ് ഇപ്പോൾ വൈറലായിരിക്കുന്നത്.
ന്യൂയോർക്കിൽ വെച്ച് ഇന്ദ്രജിത്തും പൃഥ്വിരാജും കണ്ടുമുട്ടിയപ്പോഴുള്ള ചിത്രമാണ് ഇന്ദ്രജിത്ത് പങ്കുവെച്ചത്. “ബ്രോ ബോണ്ടിങ് ഇൻ ന്യൂയോർക്ക്” എന്ന അടിക്കുറിപ്പോടെയാണ് ഇന്ദ്രജിത്ത് ചിത്രങ്ങൾ പങ്കിട്ടത്. എമ്പുരാൻ, എൽ2ഇ എന്നീ ഹാഷ്ടാഗുകളും ചേർത്തിട്ടുണ്ട്. പൃഥ്വിരാജിന്റെ ഭാര്യ സുപ്രിയയെയും ചിത്രത്തിൽ കാണാം. ആരാധകർ ഇരുകയ്യും നീട്ടിയാണ് ചിത്രങ്ങൾ സ്വീകരിച്ചത്.
ബിഗ് ബജറ്റ് ചിത്രമായ എമ്പുരാന്റെ മൂന്നാം ഷെഡ്യൂൾ ആണ് അമേരിക്കയിൽ പുരോഗമിക്കുന്നത്. കഴിഞ്ഞ വർഷം ഒക്ടോബർ അഞ്ചിനാണ് എമ്പുരാൻ്റെ ഷൂട്ടിങ് ആരംഭിച്ചത്. മോഹൻലാൽ ഉൾപ്പെടെയുള്ള താരങ്ങൾ ഇതിനോടകം ലൊക്കേഷനിൽ ജോയിൻ ചെയ്തിട്ടുണ്ട്. ഇരുപതോളം വിദേശ രാജ്യങ്ങളിലായി ചിത്രീകരണം പുരോഗമിക്കുന്ന ചിത്രത്തിന്റെ തിരക്കഥ തയ്യാറാക്കിയിരിക്കുന്നത് മുരളി ഗോപിയാണ്. ആശിർവാദ് സിനിമാസും ലൈക പ്രൊഡക്ഷൻസും സംയുക്‌തമായാണ് എമ്പുരാൻ നിർമ്മിക്കുന്നത്. ലൂസിഫറിന്റെ പ്രീക്വൽ ആയ എമ്പുരാന് വേണ്ടിയുള്ള കാത്തിരിപ്പിലാണ് ആരാധകർ.
