ക്രിക്കറ്റ് ലോകകപ്പിൽ തോൽവികൾ ഏറ്റുവാങ്ങാൻ ഇഗ്ലണ്ടിന്റെ ജീവിതം ഇനിയും ബാക്കി. ഏകദിന ലോകകപ്പ് 2023 ഇൽ തോറ്റു തുന്നം പാടി നിൽക്കുന്ന മുൻ ചാമ്പ്യൻമാരെ മലർത്തിയടിച്ച് ഇന്ത്യ. 100 റൺസിന്റെ കൂറ്റൻ തോൽവിയാണ് ജോസ് ബട്ലറും സംഘവും ഇന്ന് ലഖ്നോവിലെ സ്റ്റേഡിയത്തിൽ നേരിട്ടത്. എന്നാൽ ബാറ്റർമാർ വരുത്തിയ പിഴവിൽ വീഴാതിരിക്കാനായി ബൗളർമാർ ഉണർന്നുകളിച്ചതോടെ ഇന്ത്യയുടെ വിജയം എളുപ്പമാവുകയായിരുന്നു. 7 ഓവറിൽ 22 റൺസ് വഴങ്ങി 4 വിക്കറ്റുകൾ വീഴ്ത്തിയ മുഹമ്മദ് ഷമിയാണ് ഇംഗ്ലീഷ് പടയുടെ പർജയത്തിന് മുന്നോടിയായത്. ആറ് മത്സരങ്ങളിൽ അഞ്ചും തോറ്റ ഇംഗ്ലണ്ട് സെമി കാണാതെ പുറത്താകുമെന്ന് ഇതോടെ ഉറപ്പാവുകയും ചെയ്തു.
ടോസ് നഷ്ടമായി ബാറ്റിംഗിനിറങ്ങിയ രോഹിത് ശർമയ്ക്കും സംഘത്തിനും നിശ്ചിത 50 ഓവറിൽ 9 വിക്കറ്റ് നഷ്ടത്തിൽ 229 റൺസ് മാത്രമാണ് എടുക്കാൻ കഴിഞ്ഞത്. നായകനൊഴിച്ചുള്ള ടോപ് ഓർഡർ ബാറ്റർമാരെല്ലാം രണ്ടക്കം പോലും തികയ്ക്കാതെ പുറത്തായതോടെ ഇന്ത്യ പരുങ്ങലിലാവുകയായിരുന്നു. എന്നാൽ, 101 പന്തുകളിൽ 10 ഫോറും മൂന്ന് സിക്‌സുമടക്കം 87 റണ്‍സെടുത്ത രോഹിത് ശർമ വലിയ തകർച്ചയിൽ നിന്ന് ടീമിനെ കരകയറ്റി.
