ഏകദിന ലോകകപ്പിൽ ഓസ്ട്രേലിയയ്ക്ക് കൂറ്റൻ വിജയം. ഓസിസിന്റെ ബാറ്റിംഗിന് മുന്നിൽ പിടിച്ചു നിൽക്കാനാവാതെ നെതർലൻഡ്സ് വീണു. ഓസീസ് ഉയർത്തിയ 400 റൺസെന്ന വിജയലക്ഷ്യവുമായി ഇറങ്ങിയ നെതർലൻഡ്സ് 21 ഓവറിൽ വെറും 90 റൺസിന് എല്ലാവരും ദയനീയമായി പരാജയപ്പെട്ടു. സെഞ്ച്വറി നേടിയ ഔസ്ട്രേലിയൻ താരം ഗ്ലെൻ മാക്സ്വെൽ ആണ് കളിയിലെ താരം. ഓസ്ട്രേലിയക്കായി ആദം സാംപ നാല് വിക്കറ്റ് വീഴ്ത്തി.
അതേസമയം ലോകകപ്പിന്‍റെ ചരിത്രത്തിൽ ആദ്യമായാണ് ഒരു ടീം 300ലേറെ റൺസിന് വിജയിക്കുന്നത്. എന്നാൽ കൂറ്റൻ വിജയ ലക്ഷ്യത്തിലേക്ക് ഇറങ്ങിയ നെതർലൻഡ്സിന് ഒരു ഘട്ടത്തിലും മത്സരത്തിലേക്കെത്താനായില്ല. തുടരെ തുടരെ വിക്കറ്റുകൾ വീണതോടെ ഓസ്ട്രേലിയക്ക് റെക്കോർഡ് വിജയം നേടാനും സാധിച്ചു. 25 റൺസെടുത്ത വിക്രംജിത് സിങ്ങാണ് നെതർലൻഡ്സിന്‍റെ ടോപ് സ്കോറർ.
മിച്ചൽ മാർഷിനെ (9) തുടക്കത്തിലേ നഷ്ടമായെങ്കിലും പിന്നീട് വാർണറും (104) സ്റ്റീവ് സ്മിത്തും (71) ചേർന്നുള്ള കൂട്ടുകെട്ട് മികച്ച അടിത്തറയിട്ടു. 62 റൺസെടുത്ത മാർനസ് ലബുഷെയ്നും മികച്ച പ്രകടനമാണ് കാഴ്ച്ചവച്ചത്. അവസാന ഓവറുകളിൽ ഗ്ലെൻ മാക്സ് വെല്ലിന്റെ വെടിക്കെട്ട് പ്രകടനം സ്കോറിങ് അതിവേഗത്തിലാക്കി. 44 പന്തിൽ എട്ട് സിക്സും ഒമ്പത് ഫോറും നേടിയാണ് അദ്ദേഹം 106 റൺസെടുത്തത്. എന്നാൽ നെതർലൻഡ്സിന് വേണ്ടി ലോഗൻ വാൻ ബീക്ക് നാല് വിക്കറ്റെടുത്തു. ബാസ് ഡി ലീഡ് രണ്ടും ആര്യൻ ദത്ത് ഒരു വിക്കറ്റും നേടി.
