ഭാഗ്യയ്ക്കും ശ്രേയസിനും ആശംസയറിയിക്കാൻ സുരേഷ് ഗോപിയുടെ വീട്ടിലെത്തി ഗവര്‍ണര്‍ ആരിഫ് മുഹമ്മദ് ഖാൻ. തിരുവനന്തപുരത്തെ താരത്തിന്റെ വീടായ ‘ലക്ഷ്മി’യിലെത്തിയ ഗവർണറെ സുരേഷ് ഗോപിയും ഭാര്യ രാധികയും ചേർന്നാണ് സ്വീകരിച്ചത്. ഗവർണറുടെ സന്ദർശനത്തിന്റെ ചിത്രങ്ങൾ സുരേഷ് ഗോപി സമൂഹ്യമാധ്യമത്തിലൂടെ പങ്കുവെച്ചു.
സുരേഷ് ഗോപിയുടെ മകൾ ഭാഗ്യയ്ക്കും ഭർത്താവ് ശ്രേയസിനും ആശംസയറിയിക്കാൻ ഗവർണർ കുടുംബസമേതമാണ് എത്തിയത്. കുടുംബാംഗങ്ങൾക്കൊപ്പം വളരെ നേരം ചെലവഴിച്ച അദ്ദേഹം നവദമ്പതികളെ അനുഗ്രഹിക്കുകയും ചെയ്തു. ”ബഹുമാനപ്പെട്ട കേരള ഗവർണർ ആരിഫ് മുഹമ്മദ് ഖാൻ നവദമ്പതികളെ അനുഗ്രഹിക്കാനായി ‘ലക്ഷ്മി’ സന്ദർശിച്ചപ്പോൾ. ഉച്ചഭക്ഷണത്തിന് ഞങ്ങളോടൊപ്പം ചേർന്നു” എന്ന കുറിപ്പോടെയാണ് സുരേഷ് ഗോപി ചിത്രങ്ങൾ പങ്കിട്ടത്.
ഗവർണർക്ക് വിഭവ സമൃദ്ധമായ സദ്യയാണ് താരം ഒരുക്കിയത്. സുരേഷ് ഗോപിയുടെ കുടുംബാംഗങ്ങളോടൊപ്പമുള്ള ഗവർണറുടെ ചിത്രങ്ങൾ സോഷ്യൽമീഡിയയിൽ വൈറലായിട്ടുണ്ട്.
