ശ്രദ്ധേയമായ കഥാപാത്രങ്ങളിലൂടെ മലയാള സിനിമയിൽ തന്റേതായ സ്ഥാനം നേടിയെടുത്ത താരമാണ് ഫഹദ് ഫാസിൽ. നടനായും നിർമ്മാതാവായും സിനിമാ മേഖലയിൽ തിളങ്ങുന്ന താരം നിലവിൽ അന്യഭാഷകളിലും പ്രശസ്തനാണ്. ഇപ്പോൾ ഫഹദ് ഫാസിൽ നടത്തിയ വെളിപ്പെടുത്തലിൽ ഞെട്ടിയിരിക്കുകയാണ് ആരാധകർ. താൻ അറ്റൻഷൻ ഡെഫിസിറ്റ് ഹൈപ്പർ ആക്ടിവിറ്റി ഡിസോർഡർ (എ.ഡി.എച്ച്.ഡി) രോഗബാധിതനാണെന്നാണ് താരം തുറന്നുപറഞ്ഞിരിക്കുന്നത്.
41-ാം വയസിലാണ് തനിക്ക് രോഗം കണ്ടെത്തിയതെന്നും അദ്ദേഹം വ്യക്തമാക്കി. കുട്ടികളായിരിക്കുമ്പോൾ തന്നെ എഡിഎച്ച്‌ഡി കണ്ടെത്തിയാൽ ചികിത്സിച്ച് മാറ്റാമെന്നും എന്നാൽ തനിക്ക് 41-ാം വയസിൽ കണ്ടെത്തിയതിനാൽ ഇനി അത് മാറാനുള്ള സാധ്യതയില്ലെന്നും ഫഹദ് പറഞ്ഞു. കോതമംഗലത്തെ പീസ് വാലി ചിൽഡ്രൻസ് വില്ലേജ് നാടിന് സമർപ്പിച്ചുകൊണ്ട് സംസാരിക്കവെയാണ് ഫഹദ് തന്റെ രോഗത്തേക്കുറിച്ച് വെളിപ്പെടുത്തിയത്. സാധാരണ കുട്ടികളിലും അപൂർവമായി മുതിർന്നവരിലും ഉണ്ടാകുന്ന നാഡീവ്യൂഹ വികാസവുമായി ബന്ധപ്പെട്ട ഒരു തകരാറാണ് എ.ഡി.എച്ച്.ഡി.
ഒരു കാര്യത്തിലും ശ്രദ്ധ പതിപ്പിക്കാനാകാതെ വരിക, ഒരു കാര്യത്തിലും ക്ഷമയില്ലാതെ എടുത്തുചാടി ചെയ്യുക, ഒരു സ്ഥലത്തും അടങ്ങിയിരിക്കാതെ ഓടി നടന്ന് കാര്യങ്ങൾ ചെയ്യുക എന്നിവയാണ് എഡിഎച്ച്‌ഡി രോഗമുള്ളവരിൽ കാണപ്പെടുന്നത്. അമിതമായ ശാരീരിക പ്രവർത്തനങ്ങൾ, ഒരാളുടെ പ്രായത്തിന് അനുയോജ്യമായ വിധത്തിൽ പെരുമാറ്റം നിയന്ത്രിക്കാൻ കഴിയാതിരിക്കുക, മറവി, സമയനിഷ്ട ഇല്ലായ്‌മ, അലഞ്ഞു നടക്കുന്ന മനസ് തുടങ്ങിയവയാണ് ഈ രോഗാവസ്ഥയുടെ ലക്ഷണങ്ങൾ.
തലച്ചോറിലെ ഡോപമിൻ്റെ അളവിൽ കുറവുണ്ടാകുകയും മസ്‌തിഷ്‌കത്തിലെ ഇരു അർദ്ധഗോളങ്ങളും തമ്മിലുള്ള ഏകോപനം കുറയുകയും ചെയ്യുമ്പോഴാണ് എഡിഎച്ച്‌ഡി എന്ന മാനസികാവസ്ഥയുണ്ടാവുന്നത്. ഫഹദിന്റെ വെളിപ്പെടുത്തലിനേത്തുടർന്ന് നിരവധി പേരാണ് താരത്തിന്റെ ആരോഗ്യത്തിൽ ആശങ്ക അറിയിക്കുന്നത്.
