മികച്ച പ്രേക്ഷക പ്രതികണങ്ങൾ നേടി മുന്നേറിക്കൊണ്ടിരിക്കുകയാണ് പൃഥ്വിരാജ്- ബ്ലെസി ചിത്രം ‘ആടുജീവിതം’. മാർച്ച് 28 ന് പാൻ ഇന്ത്യൻ റിലീസായി എത്തിയ ചിത്രം ഇതിനോടകം തന്നെ 50 കോടി ക്ലബ്ബിൽ ഇടംപിടിച്ചിട്ടുണ്ട്. നാല് ദിവസം കൊണ്ട് 50 കോടി ക്ലബ്ബിൽ കയറിയ ആദ്യ മലയാള ചിത്രമെന്ന നേട്ടവും ‘ആടുജീവിതം’ സ്വന്തമാക്കി. പൃഥ്വിരാജിന്റെ ലൂസിഫറിന് ശേഷം അതിവേഗം ബോക്സോഫീസിൽ 50 കോടി നേടുന്ന ചിത്രം എന്ന റെക്കോഡും ‘ആടുജീവിതം’ സ്വന്തമാക്കിയിട്ടുണ്ട്. ബെന്യാമിന്റെ നോവലിനെ ആസ്പദമാക്കി ബ്ലെസി ഒരുക്കിയ ചിത്രത്തിന് റിലീസ് ചെയ്ത എല്ലാ കേന്ദ്രങ്ങളിൽ നിന്നും മികച്ച അഭിപ്രായമാണ് ലഭിക്കുന്നത്.
ആടുജീവിതം തിയറ്ററുകളിൽ വിജയകരമായി പ്രദർശനം തുടരുമ്പോൾ ചിത്രത്തിന്റെ ഒ.ടി.ടി റിലീസ് എന്നായിരിക്കും എന്ന ചർച്ചയും ചൂടു പിടിക്കുന്നുണ്ട്. ഒ.ടി.ടി പ്ലേയുടെ റിപ്പോർട്ട് അനുസരിച്ച് ഡിസ്നി പ്ലസ് ഹോട്ട്സ്റ്റാറാണ് ഒ.ടി.ടി റൈറ്റ് സ്വന്തമാക്കിയിരിക്കുന്നത്. റെക്കോഡ് തുകയ്ക്കാണ് സ്ട്രീമിങ് അവകാശം ഡിസ്നി പ്ലസ് ഹോട്സ്റ്റാർ സ്വന്തമാക്കിയിരിക്കുന്നത് എന്നാണ് വിവരം. അതേസമയം, സമയ ദൈർഘ്യത്തെ തുടർന്ന് തിയറ്ററിൽ നിന്ന് നീക്കം ചെയ്ത രംഗങ്ങളും ഒ.ടി.ടി പതിപ്പിലുണ്ടാകും. തിയറ്ററിൽ റിലീസ് ചെയ്ത ചിത്രത്തിന് രണ്ട് മണിക്കൂർ 57 മിനിറ്റാണ് ചിത്രത്തിന്റെ ദൈർഘ്യം. ഇതിന്റെ അൺകട്ട് വെർഷനായിരിക്കും സ്ട്രീം ചെയ്യുക. എന്നാൽ ചിത്രത്തിന്റെ ഒ.ടി.ടി റിലീസ് തിയതി ഇതുവരെ ഔദ്യോഗികമായി പ്രഖ്യാപിച്ചിട്ടില്ല.
പൃഥ്വിരാജ് നജീബായി എത്തിയ ചിത്രത്തിൽ കെ .ആർ ഗോകുൽ, ഹോളിവുഡ് നടൻ ജീൻ ലൂയിസ്, അമല പോൾ, അറബ് താരം താലിബ് അൽ ബലൂഷി, റിക്കബി എന്നിവരാണ് മറ്റു കഥാപാത്രങ്ങളെ അവതരിപ്പിച്ചിരിക്കുന്നത്. എ.ആർ റഹ്മാൻ സംഗീത സംവിധാനം നിർവഹിക്കുന്ന ചിത്രത്തിന് വേണ്ടി റസൂൽ പൂക്കുട്ടിയാണ് ശബ്ദ മിശ്രണം ചെയ്തത്. കെ.എസ്. സുനിലാണ് ചിത്രത്തിന്റെ ഛായാഗ്രാഹകന്‍. ചിത്രത്തിന്റെ എഡിറ്റിങ് നിർവഹിച്ചിരിക്കുന്നത് ശ്രീകർ പ്രസാദാണ്. മേക്കപ്പ് രഞ്ജിത്ത് അമ്പാടിയും വസ്ത്രാലങ്കാരം സമീറ സനീഷുമാണ് നിർവഹിച്ചിരിക്കുന്നത്.
